Россия терма жамоаси Рио-де-Жанейрода бўлиб ўтадиган Паралимпия ўйинларида иштирок этиш ҳуқуқига эга эмас, шунинг учун мусобақанинг очилиш маросимида ҳеч ким Россия байроғини кўтармайди. Бу ҳақда Халқаро паралимпия қўмитаси (ХПҚ) матбуот хизмати маълум қилди, деб хабар бермоқда «Интерфакс».
«Агар беларуслик спортчилар очилиш маросимида Россия байроғини кўтарса, бу ҳолат сиёсий норозилик сифатида кўрилади ҳамда тегишли спортчи ёки миллий олимпия қўмитасига нисбатан муайян чоралар кўрилади», – дейилади ХПҚ матбуот хизмати хабарида.
Аввалроқ Беларусь миллий паралимпия қўмитаси раиси Олег Шепель Паралимпия ўйинларининг очилиш маросимида нафақат Беларусь, балки Россия байроғи ҳам кўтарилиши ҳақида айтиб ўтганди.
23 август, сешанба куни Швейцариянинг Лозанна шаҳридаги Спорт арбитраж суди (CAS) Россия термасига 7–18 сентябрь кунлари ўтказиладиган Паралимпия ўйинларида иштирок этишга рухсат бермади. CAS Халқаро паралимпия қўмитасининг россияликларга нисбатан қўллаган қарорига апелляциясини қониқтирмаган эди.
Изоҳ (0)