54,5 миллион йил муқаддам яшаган ҳамда эволюциянинг кейинги икки шохобчасига бошланма берган энг қадимги ва содда примат қолдиқлари Ҳиндистон ғарбидаги Гужорат штатидан топилди. Бу ҳақда «ТАСС» хабар бермоқда.
Кўмир конининг навбатдаги қатламини қазиб очиш пайтида ишчилар кичик ҳажмли мавжудотнинг скелет қолдиқларини топиб олди. 25 та майда суяклар тўпланиб, халқаро палеонтологлар жамоасига тақдим этилди. Гархвал университети, Вайда Ҳималай геологияси институти ва Чандигарх университети, шунингдек, АҚШнинг Жон Хопкинс номли университети ходимларидан иборат жамоа қолдиқларни ўрганиб чиқиб, улар 54,5 миллион йил муқаддам яшаган жониворга тегишли эканлигини аниқлади.
Илгари энг қадимги приматлар деб Teilhardina ҳисобланар эди — уларнинг энг қадимги қолдиқлари 56 миллион йил олдинги археологик қатламлардан топилган. Лекин янги топилган примат қолдиқлари унга нисбатан примитивроқ эканлиги айтилмоқда.
Экспертларнинг фикрича, ушбу приматнинг авлодларидан бугунги кунга қадар маълум 400 дан ортиқ турдаги приматлар келиб чиққан.
«Бу ғалати туюлиши мумкин, лекин пра-приматлар ушбу туркум икки асосий гуруҳга бўлинганидан кейин ҳам мавжуд бўлган экан. Шу пайтга қадар дунёнинг қаеридан топилишидан қатъий назар, приматларнинг суяклари бугунги кунга қадар мавжуд икки кенжа туркум — ҳўлбурунли приматлар (Strepsirrhini) ва қуруқбурунли приматлар (Haplorhini) кенжа туркумларидан бирига мансуб бўлар эди. Аммо Гужорат топилмаси ҳеч бир туркумга оид эмас. Шу боис айнан шу мавжудот приматларнинг икки тармоғининг аждоди, деган хулосага келиш мумкин», — деди Жон Хопкинс университети вакили Кеннет Роуз.
Олимлар скелет қолдиқлари асосида «барча маймунлар бобоси»нинг ташқи кўринишини тиклашга эришди. Маълум бўлишича, у 150–300 грамм вазнли (каламуш ҳажмига тенг) мавжудот бўлиб, ташқи жиҳатдан бугунги лемурларга ўхшаб кетган. Кўзлари катта, қисқа бурунли жонивор дарахтларга чиқиб юрган. Ушбу дарахтларнинг қолдиқлари кўмир конини шакллантирган — қолдиқлар айнан шу кондан топилди.
Изоҳ (0)