АҚШ президентлигига номзод Дональд Трамп билан танишиш учун Trump Tower биносига кўтарилган Грейт-Фолсда (Виржиния штати) яшовчи 19 ёшли Стивен Рогата хавфли вазиятни юзага келтириш ва масъулиятсизликда айбланмоқда. Буни аввалдан режалаштирган ва керакли анжомлар харид қилиб, тайёргарлик ўтаган йигитча ота-онаси шаҳарда эмаслигидан фойдаланиб, Нью-Йоркка йўл олган. Бу ҳақда CBS телеканалига таяниб, «Интерфакс» хабар бермоқда.
Айбловга кўра, Рогата сўргич ва сим арқонлар ёрдамида осмонўпар бинога тирмашиб, аҳоли жисмоний жароҳат олиши хавфини туғдирган. У кўтарилиш чоғи ноутбукини тушириб юборган ва унинг бўлаклари бешинчи қаватдаги одамлар турган очиқ майдонга тушган. Шунингдек, Рогатанинг бинога кўтарилиши шаҳар кўчаларида тиқилинчни юзага келтирди.
Трамп билан шахсан учрашиш истагида бўлган йигитча мақсадига эришмади — икки соатдан сўнг полиция уни қўлга олди ва 21-қаватдаги дераза орқали бинога олиб кирди. Қарангки, Трампнинг ўзи бу пайтда Нью-Йоркда эмас, йигитча туғилиб-ўсган Виржинияда эди. Рогатанинг адвокати ҳимояси остидаги шахс руҳий касалликдан даволанётганини маълум қилди.
Изоҳ (0)