Тошкент шаҳрининг Юнусобод туманида Ўзбекистон Республикаси Миллий хавфсизлик хизмати чегара қўшинлари ҳарбий хизматчилари оилаларига мўлжалланган 64 хонадондан иборат тўрт қаватли замонавий уй фойдаланишга топширилди. Бу ҳақда ЎзА хабар бермоқда.
Шу муносабат билан ўтказилган тадбирда давлат ва жамоат ташкилотлари вакиллари, ҳарбийлар ва уларнинг оила аъзолари, маҳалла фаоллари, ёшлар иштирок этди.
Давлат раҳбарининг 2007 йил 14 сентябрдаги «Ўзбекистон Республикаси Қуролли Кучлари ҳарбий хизматчиларини уй-жой билан таъминлаш тартиби тўғрисидаги низомни тасдиқлаш ҳақида»ги қарори ҳарбий хизматчилар ва уларнинг оилаларини ижтимоий ҳимоя қилишда дастуриламал бўлмоқда. Ҳарбий хизматчилар ва уларнинг оила аъзолари учун кўплаб замонавий уй-жойлар, ётоқхоналар, таълим муассасалари, спорт мажмуалари ва бошқа инфратузилма объектлари қурилиб, фойдаланишга топширилмоқда.
Юнусобод туманидаги «Янги шаҳар» маҳалла фуқаролар йиғини ҳудудида барпо этилган янги кўп қаватли турар жой навбатдаги ана шундай иншоотлардан бири бўлди. «Арба» масъулияти чекланган жамияти томонидан барпо этилган янги уйда чегарачилар ва уларнинг оила аъзолари учун барча шароит яратилган. Уй олдида спорт зали, бассейн, болалар учун замонавий ўйин майдончаси қурилган.
Изоҳ (0)