2016 йил сўнгига қадар Чеченистоннинг Шали шаҳрида республика раҳбари Рамзан Қодиров номи берилган масжид очилади, деб ёзади EADaily.
Масжид лойиҳаси ўзбекистонлик меъморлар томонидан Ўрта Осиёнинг қадимги исломий пойтахтлари — Бухоро ва Самарқандда барпо этилган масжидлар услубида яратилган. Нашр таъкидлашича, Чеченистондаги масжиднинг Бухорога хос кўриниши Чеченистоннинг ҳозирги Ўзбекистонда жойлашган сўфийлик марказлари билан алоқаси тимсоли бўлиб хизмат қилади.
Шунингдек, Рамзан Қодиров номидаги масжиднинг ўзбекона услуби Қодировлар оиласининг Ўзбекистон билан алоқасини намоён қилади. Чеченистон раҳбарининг отаси Аҳмад Қодиров Бухоронинг Мир Араб мадрасасида ва Тошкент ислом институтида ўқиган. Шайх Муҳаммад Содиқ Муҳаммад Юсуф унга Ўзбекистондаги ўқиши чоғида устозлик қилган, кейинчалик у Қодировлар оиласининг яқин дўстига айланган.
Масжид «Шали-Сити» осмонўпар бинолар мажмуаси яқинидаги беш гектарлик майдонда қурилмоқда. Унинг тўрт томонида биттадан ҳар бири 63 метрли миноралар қад кўтаради, масжид гумбазининг баландлиги эса 43 метрга етади.
Иншоотни Чеченистоннинг «Мечетьстрой» компанияси барпо этмоқда, қурилиш 2012 йил декабридан буён узлуксиз давом этмоқда.
Чеченистон ОАВлари ёзишича, услуби ва безакларига кўра, Шалидаги масжид дунёда ўхшаши йўқ бўлади. Унинг ички ва ташқи томонлари оқ юнон мармари билан қопланади. Ёритиш тизими Италия компаниясига ишониб топширилган.
Изоҳ (0)