Шу кунгача Тошкент вилояти ҳокимининг биринчи ўринбосари лавозимида ишлаб келган Исламджан Эргашходжаев вилоят ҳокими вазифасини бажарувчи этиб тайинланди. Бу ҳақда Ўзбекистон ҳукумати портали хабар берди.
«Ўзбекистон Конституциясининг 93-моддаси 15-банди ва 102-моддаси ҳамда Ўзбекистон Президентининг 12 августдаги фармонига мувофиқ Исламджан Эргашходжаев Тошкент вилояти ҳокими вазифасини бажарувчи этиб тайинланди», — дейилади ҳукумат ахборотида.
Эргашходжаев Ўзбекистон Президентининг 12 августдаги бошқа бир фармони билан Тошкент вилояти ҳокими лавозимидан озод этилган Содиқ Абдуллаев ўрнини эгаллади. У 2016 йилнинг март ойида айнан Абдуллаевнинг биринчи ўринбосари этиб тайинланган эди.
Маълумот учун, Исламджан Эргашходжаев 1970 йилда Тошкент вилояти Паркент туманида туғилган. 1995 йилда Тошкент давлат юридик институтини тамомлаган.
Тошкент вилояти ҳокимининг биринчи ўринбосари лавозимини эгаллагунига қадар у Тошкент вилояти Пискент тумани ҳокими бўлиб ишлаган, 2011 йилда Тошкент вилояти Оҳангарон тумани прокурори, 2009—2011 йилларда Оҳангарон шаҳар прокурори лавозимида фаолият юритган.
Изоҳ (0)