Туркия Россияга Сурияда биргаликда жанг қилишни таклиф этди

Туркия Россияни Сурияда ИШИД жангариларига қарши биргаликда ҳаракатлар олиб боришга чақирди, деб ёзади «Ведомости».

«Биз барча тафсилотларни муҳокама қиламиз. Биз Россияга доим ИШИДга қарши қўшма ҳаракатлар олиб боришни таклиф қилиб келганмиз. Таклиф кучда қолади», — деди Туркия бош вазири Мавлуд Чавушўғли. Вазир Россияни «ИШИДга иложи борича тезроқ барҳам бериш учун биргаликда курашиш»га чақирди.

Чавушўғлининг фикрича, мамлакатлар ўртасидаги яқин алоқа келажакда Туркия ҳарбий-ҳаво кучлари томонидан Су-24 уриб туширилиши каби инқирозли ҳолатлар олдини олади. «Сурияда кўплаб мамлакатлар фаолият олиб бормоқда. Хатолар бўлиши мумкин», — деди у.

Вазирнинг сўзларига кўра, ҳамкорлик реал вақтда разведка маълумотларини айирбошлаш, шунингдек, иккала мамлакат президентлари ва ҳарбийлари ўртасидаги бевосита алоқаларни кўзда тутади.

Ўтган йили кескинлашган Туркия-Россия муносабатлари охирги пайтларда яна илиқлашиб бормоқда. Жумладан, 9 август куни Эрдўғон Санкт-Петербургга ташриф буюриб, Владимир Путин билан учрашди. Кейинроқ Путин ушбу учрашувни конструктив деб баҳолади. Эрдўғоннинг вакили эса Туркиянинг Россия билан илиқ муносабатларининг тикланиши унинг НАТО билан мулоқотни давом эттиришига тўсқинлик қилмаслигини айтди.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.