Ўзбекистон Маданият ва спорт ишлари вазирлиги ташаббуси билан Ўзбекистон миллий телерадиокомпанияси, «Ўзбекнаво» эстрада бирлашмаси, «Ўзбеккино» миллий агентлиги, Алишер Навоий номли киносарой ҳамда Ёшлар маданият ва санъат маркази ҳамкорлигида «Янги овозлар» номли телетанлов ташкил этилди. Санъат саҳнасида дастлабки қадамларини қўяётган ёшлар учун ижодий майдон сифатида кўрилаётган телетанловининг саралаш босқичида эркин кузатувчи бўлиб иштирок этган журналист Феруз Муҳаммад ўз таассуротлари билан ўртоқлашди, шунингдек, танлов юзасидан Ўзбекистонда хизмат кўрсатган артист Юлдуз Турдиева билан суҳбат уюштирди.
Саралаш босқичида Ўзбекистоннинг барча вилоятлари ҳамда Тошкент шаҳридан келган кўплаб истеъдодли, қобилиятли ёшлар қатнашди. Талабгорлар сони кўплиги боис, саралаш уч кун — 20 июлдан 22 июлга қадар давом этди. Қизғин, кескин ва муросасиз руҳда ўтган саралаш босқичи ҳар бир иштирокчи саҳна маданияти қоидаларига риоя этиши, танловда қатнашиш учун танлаган қўшиқлари билан ўз устида катта масъулият билан ишлаганини кўрсатди.
Иштирокчилар орасида миллий ҳамда замонавий эстрада, опера, джаз, мумтоз йўналишда куйлаганлар кўпчиликни ташкил қилди. Бундан ташқари, ёш ижрочиларнинг инглиз, рус, француз, италян, турк, озарбайжон каби хорижий тилларда ҳам бемалол куйлай олиши ҳар қандай томошабинни ҳайратга солиши турган гап. Уларнинг ажойиб чиқишларини баҳолашда ҳакамларга ҳам осон бўлгани йўқ.
Ўрни келганда таъкидлаш жоиз, танловнинг саралаш босқичида Ўзбекистонда хизмат кўрсатган артистлар Тоир Қўзиев, Азим Муллахонов, Юлдуз Турдиева, Самандар Ҳамроқулов, Алишер Файз, Ўзбекистон халқ артисти Гулсанам Мамазоитова, Ўзбекистонда хизмат кўрсатган маданият ходими, шоир Бобур Бобомурод ва хонанда Акбар Отамуҳаммедов ҳакамлик қилди. Эътиборга молик томони, улар устоз кўрмаган, аммо овоз имконияти баланд пардаларда бемалол куйлашга имкон берадиган ёшларга ҳам кейинги босқичда қатнашиш учун рухсат берди, уларга мос устозларни ҳам тавсия қилди.
Саралаш босқичи якунида ҳакамлар ҳайъати аъзоларидан бири, Ўзбекистонда хизмат кўрсатган артист Юлдуз Турдиева билан суҳбат уюштирилди.
— Телетанлов иштирокчиларининг аксариятида учраётган умумий хато нимадан иборат?— Қобилиятли, истеъдодли, шижоатли иштирокчилар кўп. Аксариятининг умумий хатоси — овозига мос асарни танламаган. Натижада иштирокчиларга 3—4 марталаб қўшиқлар бериб, синаб, нимага қодирлигини аниқлаяпмиз. Кўп иштирокчилар ёшига нисбатан катта қўшиқларни танлаган.
— Уларнинг ютуқли томонлари ҳақида нималар дея оласиз?— Кўплаб иштирокчилар чет тилидаги қўшиқларни ўша тил нутқ маданияти, талаффуз қоидаларига риоя этган ҳолда, керак бўлса, профессионаллардек куйламоқда. Авжли пардаларни маромига етказиб ижро этаётган янги овозларни кўриб, кўзимга ёш ҳам келди.
— Сиз ҳам халқаро кўрик танловларда Ўзбекистоннинг номини танитиб юрган хонандасиз. Боз устига, жонли ижрода куйлашингизга кўплаб ҳамкасбларингиз тан беради. Айтинг-чи, мазкур иштирокчилар орасида сизга рақобатчи, овозига ҳавасингиз келиб тинглаган иштирокчилар ҳам бормиди?— Мен санъатда устозларни ҳам, ўзимдан кейин чиқаётган хонандаларни ҳам ҳурмат қилиб, уларга ҳавас кўзи билан қарайман. Тан олиб айтиш керак, бу ёшларнинг орасида бизга рақобатчи бўла оладиган ёшлар жуда кўп.
— Иштирокчилар тайёрлаб келган қўшиқлар орасида қайси ўзбек санъаткорининг ижод наъмуналари етакчилик қилмоқда?— Ўзбекистон халқ артисти Озодбек Назарбеков.
— Чет тилларидан асосан қайси бирида кўп куйлашмоқда?— Инглиз тилида кўп куйлашди.
— Саралаш босқичидаги ташкилотчиликни қандай баҳолайсиз. Иштирокчилар 100 фоиз жонли куйлагани техник муаммолар келтириб чиқармадими?— Ташкилотчилик аъло даражада, жонли ижрода куйлаш учун барча имкониятлар яратилган. Ташкилотчилар билан боғлиқ муаммо бўлгани йўқ.
— Иштирокчиларнинг саҳнада ўзини тутиши, кийиниш маданиятига қандай баҳо берасиз?— Тўғрисини айцам, ўғил бола иштирокчилар кийиниш маданиятига бир қадар эътиборсизлик қилган. Саҳнада ўзини тутишга келсак, иштирокчиларнинг 70 фоизида ҳаяжонни кузатдик. Яширишга қанча уринмасин, овозидаги титроқдан, савол-жавоб жараёнидан уларнинг ҳаяжонланаётгани билиниб қолди. Ҳаяжоннинг кўпайиб кетиши ижрога, қобилиятни тўла намоён қилишга халал бериши мумкин.
— Ҳакамлар орасида тортишув ва мунозаралар бўлиб турди. Бу ҳақда нима дея оласиз?— Тўғри, баъзан келишмовчилик ҳолатлари ҳам бўлди. Сабаби — иштирокчилар ниҳоятда қобилиятли, ўз навбатида, ҳар бир ҳакамнинг иштирокчига нисбатан ўз талаби бор. Мисол учун, мен анъанавий, миллий мумтоз қўшиқларни тинглашни хоҳласам, бошқа бир ҳакам умуман бошқа йўналишни эшитишни хоҳлайди. Ҳакамларнинг услуби хилма-хил бўлганининг яхши томони ҳам айнан шунда. Аммо барча ҳакамларнинг мақсади битта — иштирокчилар орасида янги овозларни аниқлаш.
Маълумот учун, айни кунларда телетанловнинг кейинги босқичига қизғин тайёргарлик кўрилмоқда. Алишер Навоий номли киносаройда танловни ўтказиш учун барча шароитларга эга замонавий студия ҳозирланган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)