Араб мамлакатлари тўртлиги (Баҳрайн, Миср, Бирлашган Араб Амирликлари ва Саудия Арабистони) Эроннинг араб давлатлари ички ишларига аралашувини қоралади. Бу ҳақда «ТАСС» хабар берди.
Учрашув Мавритания пойтахти Нуакшотда ўтказилаётган Араб давлатлари лигасига аъзо мамлакатлар ТИВ раҳбарлари йиғилиши доирасида бўлиб ўтди.
Тўртлик Теҳрон ҳукуматини араб мамлакатлари ички ишларига аралашувига чек қўйиш, террорчилик гуруҳлари ва ташкилотларини қўллаб-қувватлашга якун ясаш, шунингдек, араб мамлакатларига нисбатан тажовузкор баёнотларини тўхтатишга чақирди.
Нуакшотда чоп этилган ҳужжатда Эрон билан муносабатлар мамлакатлар суверенитетини ҳурмат қилиш ва яхши қўшничилик тамойилларига асосланиши лозимлиги ҳақида сўз боради.