Таиланд полицияси Twitter’да шаҳзоданинг суратини улашган журналистнинг рафиқасини қўлга олди

22 июль куни Таиланд полицияси шотландиялик журналист Эндрю Макгрегорнинг рафиқасини қўлга олди. Бу ҳақда TJournal хабар бермоқда.

Журналист Таиланд шаҳзодасининг ғалати либосда тушган фотосуратини Twitter орқали улашган эди. Унинг рафиқаси шу сабабдан қўлга олингани айтилмоқда. Кейинчалик полиция вакиллари ушбу тахминни тасдиқлади.

Полициячилар Макгрегорнинг оиласи турган уйга бостириб кириб, унинг Таиланд фуқароси бўлган рафиқаси ҳамда уч ёшли ўғли Чарлини олиб кетган. Бундан ташқари, уйдан компьютер техникаси ва бир қанча ҳужжатлар олиб чиқиб кетилган.

Reuters’нинг собиқ ходими бўлган Макгрегор узоқ вақтдан бери Бангкокда истиқомат қилади. Ўз фаолияти давомида у расмий ҳокимиятни ва қироллик оиласини кўп бора танқидга олган, бу эса мамлакатда жиноят ҳисобланиб, 15 йилгача қамоқ билан жазоланади. Reuters унинг танқидий ишларини чоп этишдан бош тортгач, Макгрегор агентликдан кетиб, Таиланддаги коррупция ва сўз эркинлигининг бўғилиши ҳақида китоб ёзди.

Журналист ва унинг рафиқаси Таиланддан 2011 йилда чиқиб кетган, Макгрегорга мамлакатга кириш тақиқланган. Полиция унинг рафиқаси қариндошларини кўргани келганидан фойдаланиб уни ҳибсга олди.

Ўша пайтда Гонконгда командировкада бўлган Макгрегор бу хабарни эшитиб, Facebook’даги саҳифаси орқали рафиқаси унинг журналистик фаолиятида иштирок этмаганини ҳамда унинг Таиланд ҳукуматига нисбатан танқидий ёндашувига қўшилмаслигини маълум қилди. Унинг рафиқаси ҳам журналист бўлиб, илгари Reuters ва NBC билан ҳамкорлик қилган.

Макгрегорнинг фикрича, унинг ишлари учун рафиқасини ушлаш ғайриҳуқуқий бўлиб, Таиланд ҳукумати унинг ўзини экстрадиция қилишга уриниши мантиқлироқ бўларди.

21 июль куни Эндрю Макгрегор Германиянинг Bild нашрида чоп этилган фотосуратни Twitter’да улашди. Унда Таиланднинг 63 ёшли шаҳзодаси Махи Вачиралонгкорн Мюнхен аэропортига оқ топикда келгани тасвирланган.

Таиланд полицияси «қироллик оиласини ҳақорат қилувчи» сурат қалбаки эканлигини уқтирмоқда.

Макгрегорнинг рафиқасини маҳкамада тўрт соат тутиб туришди, сўнг қўйиб юборишди. Маҳаллий матбуотга берган интервьюсида аёл турмуш ўртоғидан Таиланд ҳукуматини танқид қилишни тўхтатишни сўрашини маълум қилди.