«Ўзбекнаво» эстрада бирлашмаси махсус рухсатнома (лицензия) берувчи ташкилий бошқарма бошлиғи Одилжон Абдуқаҳҳоров хонандалар Сарвар ва Комил, шунингдек, актриса ва хонанда Ситора Фармонованинг лицензиялари тугатилиши сабабларини маълум қилди. Бу ҳақда журналист Феруз Муҳаммад хабар берди.
«Биринчидан, ҳеч бир хонанданинг лицензияси бекордан бекорга тугатилмайди. Мазкур хонандалар хорижга чиқиб, огоҳлантирмасдан дам олиши майли, белгиланган тартиб-қоидаларни бузиб, концерт бериш даражасига ҳам етмоқда. Ўзбек санъаткорларининг чет элда концерт бериши яхши, аммо унинг ҳам ўзига яраша тартиб-қоидалари бор. Санъаткорларимиз қаерда концерт бераётганини биз билишимиз керак», — деди «Ўзбекнаво» вакили.
«Иккинчидан, санъаткорларимиз чет элга бориб, у ерда 200—250 кишилик залларни ҳам тўлдира олмаслиги уятли ҳолат — эртага кимдир ушбу ҳолатни ҳам ёзиб чиқиши мумкин. Асосий мақсадимиз — ўзбек эстрада санъатини кўтариш, дунёга танитиш. Лекин санъаткорларимиз чет элга берухсат бориб, 200 кишилик зални ҳам тўлдира олмай, текинга концерт бериб, шарманда бўлиб қайтиб келишларини хоҳламаймиз», — деди Одилжон Абдуқаҳҳоров.
«Бундай ҳолатлар Сарвар ва Комил ҳамда Ситора Фармонова томонидан бир неча бор такрорланмоқда. Улар ‘Ўзбекнаво’ эстрада бирлашмасини огоҳлантирмасдан чет элга чиқмоқда. Лицензия битимларида санъаткорларнинг огоҳлантирмасдан хорижга чиқиши мумкин эмаслиги кўрсатиб ўтилган. Хорижга чиқиш тартиб-қоидаларини бузганликлари учун уларга нисбатан ушбу тартиб қўлланилди», — дея қўшимча қилди «Ўзбекнаво» бошқарма бошлиғи Одилжон Абдуқаҳҳоров.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)