Хонанда ва сухандон Шуҳрат Қаюмовнинг саломатлиги ёмонлашиб, даволаниш учун чет элга кетгани ҳақидаги хабарларга аниқлик киритиш мақсадида журналист Феруз Муҳаммад санъаткор билан боғланди.
«Журналистлар баъзан суриштирмасдан маълумотларни бериб юбориб, шов-шув кўтаришади. Ҳозир Россиянинг Краснодар ўлкасидаги Геленжик шаҳарида денгиз бўйида ҳордиқ чиқаряпман. Саломатлигим ёмонлашгани ҳақидаги гап-сўзлар эса — бўлмаган гаплар. Атайлаб бировга билдирмай кетган эдим, буни кўпчилик билиши керак эмас, деб ҳисоблагандим. Аммо барибир кўпчилик бундан хабар топиб улгурди», — деди Шуҳрат Қаюмов.
«Мен ҳам эл қатори ёзги таътилда Ўзбекистондаги байрамлар, хусусан, Мустақиллик байрами арафасида яхшилаб дам олиб, кучга тўлиб келиш мақсадида сафарга йўл олгандим. Сир эмас, концертим арафасида қаттиқ шамоллаган эдим, бу шамоллашга денгиз ҳавоси яхши даво бўлгани сабаб, дам олишга чиққан эдим. Касаллигим ваҳима қилар даражада хавфли ёки оғир эмас. Аслида концертим вақтидаёқ, баҳорнинг ўзида тузалиб қолган эдим», — дейди хонанда.
«Фарзандларимиз катта бўлиб, уларни уйли-жойли қилиб, ўзларини эплай оладиган, ақл-заковати жойида бўлган даражада вояга етказганимиздан сўнг, ҳаётимда биринчи бор умр йўлдошим билан саёҳатга чиқишим. Хурсанд бўладиган жойим, шунча одам мен ҳақимда қайғуриб, соғлиғимдан хавотирланиб, Telegram орқали соғлиғимдан хабар олмоқда. Яширадиган, соғлиғимга жиддий таъсир қиладиган касаллик ҳақида гап-сўз ҳам бўлиши мумкин эмас», — деди таниқли сухандон.
«Тўғриси, бу йил ишларим жуда кўп. Телевидениеда 20 дан ортиқ шогирд тайёрлаяпман, кўрсатувлар, тадбирлар ва янги лойиҳалар учун режаларимиз жуда кўп. Мустақиллик байрамига ҳам пухта ҳозирлик кўрамиз. Ҳамюртларимиздан менинг саломатлигим ҳақида яна шундай мазмундаги асоссиз ахборот чиқса, унга ишонмасликларини ва жиддий олмасликларини сўраб қоламан», — дея қўшимча қилди Шуҳрат Қаюмов.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)