Канада Ироққа дала госпиталини жойлаштиради

Канада ИШИДга қарши курашиш бўйича халқаро коалиция аъзоларининг умумий ҳаракатлари доирасида Ироқда дала госпиталини жойлаштиради. Бу ҳақда 20 июль, чоршанба куни Канада мудофаа вазири Харжит Сингх Сажан маълум қилди, дея хабар бермоқда «ТАСС».

«Коалициянинг Ироқдаги ҳаракатларида бўшлиқлар борлиги аниқланди, уларни тўлдириш зарур. Шулардан бири бу тиббий муассасалардир», — деди вазир. Унинг сўзларига қараганда, Канада Ироққа 60 нафар ҳарбий шифокорни юборишни режалаштирмоқда.

Госпитални эса йил давомида Ирбил шаҳри яқинида фронт ёнидаги жойларга жойлаштириш режалаштирилмоқда.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.