Ди Каприо Ниццада ҳалок бўлганларнинг оилаларига ёрдам кўрсатади

Голливуд актёри Леонардо ди Каприо Франциянинг Ницца шаҳрида содир этилган теракт қурбони бўлганларнинг оилаларига моддий ёрдам кўрсатишни режалаштирмоқда. Бу ҳақда, AFP’га асосланиб, «ТАСС» хабар бермоқда.

20 июль куни Сен-Тропеда ди Каприо шафелигидаги жамғарма хайрия гала-тушлигини ташкил этди. Тадбир давомида ўтказилган савдода Пабло Пикассонинг асарлари сотилди. Тадбирда кўплаб кино юлдузлари ва меценатлар иштирок этди.

Ди Каприо жамғармаси тушлик давомида жами 45 миллион доллар тўплади. Бу маблағнинг бир қисми Ницца қурбонларининг оилаларига ёрдам тариқасида тарқатилади, бир қисми эса бошқа хайрия лойиҳаларига йўналтирилади.