Террорчиликка алоқадар бўлган тўрт киши август ойида бўлиб ўтадиган Рио–2016 Олимпиада ўйинларига бориш учун ҳаракат қилган. Бу ҳақда Globo телеканалига таяниб, «ТАСС» хабар бермоқда.
Телеканал ушбу хабарни Олимпиада ўйинлари арафасида Бразилия томонидан ташкил этилган ҳамда АҚШ, Буюк Британия, Франция, Испания, Бельгия, Аргентина ва Парагвай расмийлари иштирокидаги Бирлашган аксилтеррор марказидан олинган хабарларга таяниб маълум қилган. Марказ мутахассислари Рио–2016 ўйинлари учун аккредитация сўраган 460 минг кишидан 40 нафари ўз мамлакатининг махсус хизмати томонидан «хавфли рўйхат»дан жой олганини, шулардан 4 нафари террорчиликка алоқадор эканини аниқлади.
Ушбу кишиларнинг исм-шарифи ва уларга қарши қўйилган айбловлар номи ошкор этилмаяпти. Уларнинг барчасига Олимпиада аккредитациясини бериш рад этилди, фаолияти эса махсус назорат остига олинди.
Бразилия мудофаа вазири Раул Жунгманн Франциянинг Ницца шаҳрида бўлиб ўтган терактдан сўнг Олимпиада ўйинлари давомида хавфсизликни таъминлаш бўйича чора-тадбирларни кучайтиришини маълум қилганди.
Эслатиб ўтамиз, Рио–2016 Олимпиада ўйинлари 5–21 август кунлари бўлиб ўтади.
Изоҳ (0)