Канадалик рэпер Дрейк OVO x Air Jordan’нинг соф олтиндан ишланган бир жуфт кроссовкасига эга бўлди. Уни яратиш устида америкалик рассом Мэтью Сенна иш олиб борган, дея хабар бермоқда Highsnobiety. Мусиқачи янги кроссовкасининг суратини Instagram’даги саҳифасига жойлаган.
Олтин кроссовкаларнинг ҳар бир қисми унинг оригиналини айнан такрорлайди: унинг боғичлари олтиндан қуйилган. Орқа қисмида эса баскетболчининг тўп билан силуэти акс эттирилган. Дрейкнинг сўзларига қараганда, пойабзалнинг оғирлиги 100 фунтга яқин (45 килограмм атрофида).
Air Jordan Nike компанияси томонидан америкалик баскетболчи Майкл Жордан учун ишланган бренддир. Air Jordan 1 биринчи марта 1985 йилда «Чикаго Буллс» жамоасининг анъанавий ранглари — қизил-қора рангда чиқарилган.
Дрейк — канадалик машҳур рэпер ва қўшиқчи. Forbes томонидан 2015 йилда тузилган энг кўп ҳақ тўланувчи хип-хоп ижрочиларининг рўйхатида у учинчи ўринни эгаллаган.