АҚШ полициясининг афроамерикаликларга нисбатан нохолислиги ҳақиқатда мавжуд ва статистик жиҳатдан барча кўрсаткичлар бўйича тасдиқланади. Бундай хулосага Гарвард университети профессори Роланд Фрайер ўз тадқиқоти якунларига кўра келди, деб ёзади «ТАСС».
Фрайер ўз ёрдамчилари билан Техас, Флорида ва Калифорниядаги ўнлаб йирик шаҳар полиция департаментлари маълумотлар базасини ўрганиб чиқди. Улар ўт очиш билан боғлиқ ҳодисаларга эътибор қаратди. Натижада шу нарса аниқландики, полиция билан тўқнаш келганда, афроамерикаликлар оқ танлиларга қараганда кўпроқ калтакланади ва кишанланади. Уларга қарши таёқ (дубинка) қўллаш, уларни ерга босиш, юзини деворга қаратиб қўйиш, ўқотар қурол билан қўрқитиш ҳолатлари кўпроқ учраши маълум бўлди. Ушбу кўрсаткичлар бўйича оқ танли ва афроамерикаликлар ўртасидаги фарқ 16—25 фоизни ташкил этди.
Аммо Хьюстон полицияси маълумотларига кўра, гумонланувчи оқ танли бўлса, полициячиларнинг унга қарата ўқ узиш эҳтимоли тахминан 20 фоизга юқорироқ бўларкан. Бу натижа кутилмаган бўлиб чиқди. Уни қўшимча тарзда ўрганиш ва тасдиқлаш керак бўлади.
Эслатиб ўтамиз, 6 июль куни АҚШнинг Миннесота штатидаги Фолкон-Хайц шаҳрида полициячи қора танли эркакнинг машинасини тўхтатиб, афроамерикаликни отиб ўлдирган эди. Ушбу воқеа қора танлиларнинг норозилигига сабаб бўлди.
7 июль, пайшанба куни бир нечта номаълум кимсалар Даллас полициячиларига қарата ўқ узгани хабар қилинганди. Улардан уч нафари қўлга олинди. Отишмалар оқибатида 5 нафар полициячи ҳалок бўлди, 7 нафари яраланди. Яна бир фуқаро жабрланди.
Изоҳ (0)