AQSh politsiyasining afroamerikaliklarga nisbatan noxolisligi haqiqatda mavjud va statistik jihatdan barcha ko‘rsatkichlar bo‘yicha tasdiqlanadi. Bunday xulosaga Garvard universiteti professori Roland Frayer o‘z tadqiqoti yakunlariga ko‘ra keldi, deb yozadi “TASS”.
Frayer o‘z yordamchilari bilan Texas, Florida va Kaliforniyadagi o‘nlab yirik shahar politsiya departamentlari ma’lumotlar bazasini o‘rganib chiqdi. Ular o‘t ochish bilan bog‘liq hodisalarga e’tibor qaratdi. Natijada shu narsa aniqlandiki, politsiya bilan to‘qnash kelganda, afroamerikaliklar oq tanlilarga qaraganda ko‘proq kaltaklanadi va kishanlanadi. Ularga qarshi tayoq (dubinka) qo‘llash, ularni yerga bosish, yuzini devorga qaratib qo‘yish, o‘qotar qurol bilan qo‘rqitish holatlari ko‘proq uchrashi ma’lum bo‘ldi. Ushbu ko‘rsatkichlar bo‘yicha oq tanli va afroamerikaliklar o‘rtasidagi farq 16—25 foizni tashkil etdi.
Ammo Xyuston politsiyasi ma’lumotlariga ko‘ra, gumonlanuvchi oq tanli bo‘lsa, politsiyachilarning unga qarata o‘q uzish ehtimoli taxminan 20 foizga yuqoriroq bo‘larkan. Bu natija kutilmagan bo‘lib chiqdi. Uni qo‘shimcha tarzda o‘rganish va tasdiqlash kerak bo‘ladi.
Eslatib o‘tamiz, 6-iyul kuni AQShning Minnesota shtatidagi Folkon-Xayts shahrida politsiyachi qora tanli erkakning mashinasini to‘xtatib, afroamerikalikni otib o‘ldirgan edi. Ushbu voqea qora tanlilarning noroziligiga sabab bo‘ldi.
7-iyul, payshanba kuni bir nechta noma’lum kimsalar Dallas politsiyachilariga qarata o‘q uzgani xabar qilingandi. Ulardan uch nafari qo‘lga olindi. Otishmalar oqibatida 5 nafar politsiyachi halok bo‘ldi, 7 nafari yaralandi. Yana bir fuqaro jabrlandi.
Izoh (0)