БМТ Хавфсизлик кенгаши Жанубий Судан пойтахти Жуба шаҳрида 7–8 июль кунлари ҳукумат кучлари ва қуролланган мухолифатчилар ўртасида бўлиб ўтган тўқнашувларни кескин қоралаб, ҳукуматдан жангари ҳаракатларни тўхтатиш борасида чоралар кўришини талаб қилди. Бу ҳақда «ТАСС» хабар бермоқда.
Хавфсизлик кенгаши томонларнинг тинчлик келишувига амал қилмаётганидан хавотирда. БМТ Хавфсизлик кенгаши Жанубий Судан 9 июль куни мустақиллигининг 5 йиллигини нишонлаганини эслатди ва маҳаллий сиёсатчилар, шу жумладан, президент Салва Киир ва унинг ўринбосари – қўзғолончиларнинг собиқ етакчиси Риек Машарни етакчилик хусусиятини намойиш этиб, мамлакатнинг тинчлик ва хавфсизлигини таъминлашга чақирди.
2013 йил декабрида Салва Киир қўзғолончиларнинг собиқ етакчиси, ўзининг ўринбосари Риек Машарнинг лавозимидан бўшатиши Жанубий Суданда можаро келиб чиқишига сабаб бўлди. Икки сиёсатчи ўртасидаги қарама-қаршилик туфайли уларнинг тарафдорлари, икки хил миллат вакиллари ўртасида тўқнашувлар содир бўлиши тезлик билан авж олди. Бунинг натижасида 10 мингга яқин киши ҳалок бўлди, 2,2 миллион аҳоли қочқинга айланди.
Эслатиб ўтамиз, Жанубий Судан пойтахти Жуба шаҳрида 8 июль, жума куни кечқурун мамлакат президентига содиқ ҳарбийлар ва собиқ исёнчилар ўртасида юзага келган тўқнашувлар оқибатида 150 дан ортиқ одам ҳалок бўлди. Аввалроқ ҳукуматга хизмат қилувчи ҳарбийларнинг камида 5 нафари тўқнашувлар оқибатида ҳалок бўлгани ҳақида хабар қилинганди.
Изоҳ (0)