BMT Xavfsizlik kengashi Janubiy Sudan poytaxti Juba shahrida 7–8-iyul kunlari hukumat kuchlari va qurollangan muxolifatchilar o‘rtasida bo‘lib o‘tgan to‘qnashuvlarni keskin qoralab, hukumatdan jangari harakatlarni to‘xtatish borasida choralar ko‘rishini talab qildi. Bu haqda “TASS” xabar bermoqda.
Xavfsizlik kengashi tomonlarning tinchlik kelishuviga amal qilmayotganidan xavotirda. BMT Xavfsizlik kengashi Janubiy Sudan 9-iyul kuni mustaqilligining 5 yilligini nishonlaganini eslatdi va mahalliy siyosatchilar, shu jumladan, prezident Salva Kiir va uning o‘rinbosari – qo‘zg‘olonchilarning sobiq yetakchisi Riyek Masharni yetakchilik xususiyatini namoyish etib, mamlakatning tinchlik va xavfsizligini ta’minlashga chaqirdi.
2013-yil dekabrida Salva Kiir qo‘zg‘olonchilarning sobiq yetakchisi, o‘zining o‘rinbosari Riyek Masharning lavozimidan bo‘shatishi Janubiy Sudanda mojaro kelib chiqishiga sabab bo‘ldi. Ikki siyosatchi o‘rtasidagi qarama-qarshilik tufayli ularning tarafdorlari, ikki xil millat vakillari o‘rtasida to‘qnashuvlar sodir bo‘lishi tezlik bilan avj oldi. Buning natijasida 10 mingga yaqin kishi halok bo‘ldi, 2,2 million aholi qochqinga aylandi.
Eslatib o‘tamiz, Janubiy Sudan poytaxti Juba shahrida 8-iyul, juma kuni kechqurun mamlakat prezidentiga sodiq harbiylar va sobiq isyonchilar o‘rtasida yuzaga kelgan to‘qnashuvlar oqibatida 150 dan ortiq odam halok bo‘ldi. Avvalroq hukumatga xizmat qiluvchi harbiylarning kamida 5 nafari to‘qnashuvlar oqibatida halok bo‘lgani haqida xabar qilingandi.
Izoh (0)