Японияда жазирамадан бир ҳафта ичида 6 киши ҳалок бўлди

Японияда сўнгги бир ҳафта ичида иссиқ уриши оқибатида 6 киши ҳаётдан кўз юмди, 2 847 нафари шифохонага етказилди. Бу ҳақда мамлакат ФВВ ва тез ёрдам функциясини бажарувчи ўт ўчириш бош бошқармаси маълум қилди, деб хабар бермоқда «ТАСС».

Қайд этилишича, жазирама туфайли жабрланганлар сони июнь ойига нисбатан уч баробар ошди. Апрель ойида иссиқ уриши оқибатида 9 минг киши шифохонага тушганди.

Ўтган ҳафтанинг дам олиш кунлари Япониянинг деярли барча ҳудудларида иссиқ об-ҳаво кузатилди. Мамлакатнинг бир қатор марказий ҳудудларида термометр +38 даражадан юқори кўрсаткични қайд этган. Маҳаллий тиббиёт хизмати ходимлари одамларга пана жойларда бўлишни, қуёшдан сақлайдиган бош кийимларни кийиб, имкон қадар кўпроқ суюқлик истеъмол қилишни тавсия этмоқда.

Япония метеорологик бошқармаси бу йилги ёз фаслининг жазирама бўлаётганини Тинч океанидаги Эль-Ниньо ва Ла-Нинья иқлим феноменларининг таъсири деб тахмин қилмоқда. Жазираманинг авж олиши июль охири ва август бошига тўғри келади.

Ўтган йили Японияда жазирама туфайли 100 дан ортиқ киши вафот этган, яна 53 минг нафари шифохонага ётқизилганди.