Yaponiyada so‘nggi bir hafta ichida issiq urishi oqibatida 6 kishi hayotdan ko‘z yumdi, 2 847 nafari shifoxonaga yetkazildi. Bu haqda mamlakat FVV va tez yordam funksiyasini bajaruvchi o‘t o‘chirish bosh boshqarmasi ma’lum qildi, deb xabar bermoqda “TASS”.
Qayd etilishicha, jazirama tufayli jabrlanganlar soni iyun oyiga nisbatan uch barobar oshdi. Aprel oyida issiq urishi oqibatida 9 ming kishi shifoxonaga tushgandi.
O‘tgan haftaning dam olish kunlari Yaponiyaning deyarli barcha hududlarida issiq ob-havo kuzatildi. Mamlakatning bir qator markaziy hududlarida termometr +38 darajadan yuqori ko‘rsatkichni qayd etgan. Mahalliy tibbiyot xizmati xodimlari odamlarga pana joylarda bo‘lishni, quyoshdan saqlaydigan bosh kiyimlarni kiyib, imkon qadar ko‘proq suyuqlik iste’mol qilishni tavsiya etmoqda.
Yaponiya meteorologik boshqarmasi bu yilgi yoz faslining jazirama bo‘layotganini Tinch okeanidagi El-Ninyo va La-Ninya iqlim fenomenlarining ta’siri deb taxmin qilmoqda. Jaziramaning avj olishi iyul oxiri va avgust boshiga to‘g‘ri keladi.
O‘tgan yili Yaponiyada jazirama tufayli 100 dan ortiq kishi vafot etgan, yana 53 ming nafari shifoxonaga yotqizilgandi.
Izoh (0)