Россияда ўзбекистонлик актёрлар иштирокидаги «Салам Масква!» сериали намойиши бошланди

Россиянинг Биринчи канали онлайн-кинотеатрида «Салам Масква!» кўп қисмли криминал драмасининг намойиши бошланди. Павел Бардиннинг фильмида тўрт нафар ўзбекистонлик актёр иштирок этди, деб таъкидлайди MyDay.

Сериал сюжети марказида турли давлатлардан Москвага ташриф буюрган муҳожирлар ҳамда полициянинг этник жиноятчиликка қарши курашиш бўлинмаси ходимлари тақдири туради.

Бош қаҳрамонлар — бўлинманинг тезкор ходимлари, доғистонлик Рустам ва москвалик Саня. Сериалда нафақат жиноий қидирув ва тергов ишлари, балки қаҳрамонларнинг шахсий ҳаёти ва турмуш мураккабликлари акс этади.

«Энг ёрқин қаҳрамонларимиз тожиклар, чеченлар, доғистонликлар, вьетнамликлар, руслар; улар фильмда миллий рақсларини ижро этади ва она тилида гапиради», — деб ғоясини тушунтирди фильм режиссёри Павел Бардин.

Фильмда тўрт нафар ўзбекистонлик актёр роль ижро этди.

Наргис Абдуллаева — 1981 йил 2 октябрида Ўзбекистонда туғилган. 2002 йилда Марк Вайлнинг «Илҳом» театри ҳузуридаги драматик санъат мактаб-студиясини тамомлаган. «Илҳом» театрида намойиш этилган кўплаб спектаклларда роль ижро этган.

Фарҳод Маҳмудов — 1972 йил 9 май куни Тошкентда туғилган. 1993 йилда С. А. Герасимов номидаги Бутунроссия давлат кинематография институтини тамомлаган.

Александр Цой — 1984 йил 9 октябрида Пахтакор шаҳрида (Жиззах вилояти) туғилган. Тошкент давлат санъат институтининг режиссёрлик факультетини тамомлаган. 2001–2008 йилларда Ўзбекистон ёшлар театри қошидаги студияда ишлаган.

Камилла Мухлисова. 1983 йил 26 сентябрида Тошкентда туғилган. Тошкент давлат санъат институтини тамомлаган. М. Кимсановнинг «Парвона», Б. Ёқубовнинг «Сарвиноз» фильмларида қатнашган.

Кастинг бўйича директор Тина Туманишвили Тожикистон ва Вьетнамдан профессионал актёрлар топиш катта қийинчиликлар туғдирганини айтди. Натижада вьетнамлик образлардан бирини Александр Цой ижро этди. Актёр тўғри артикуляция учун уч ой давомида вьет тилини ўрганди, сўнг унга ҳақиқий вьетнамлик овоз берди.

Сериал премьераси 30 июнь куни бўлиб ўтди. Сериални ҳар пайшанба кечки соатларда «Kino.1tv.ru» сайтида онлайн кўриш мумкин.