Tesla Model S автомобили биринчи марта ўлимга олиб келган йўл-транспорт ҳодисасига учради. АҚШ Ҳаракат хавфсизлиги миллий бошқармаси (NHTSA) ушбу ҳодиса юзасидан суриштирув ишларини бошлади, деб хабар бермоқда «Vc.ru».
ЙТҲ шу йилнинг 7 май куни, шимолий Флоридада содир бўлди. Model S автомобили шоссе бўйлаб ҳаракатланаётган вақтида юқори ёруғлик туфайли юк машинасининг тиркамаси тагига олд қисми билан кириб кетган. Бунинг оқибатида 40 ёшли Жошуа Браун ҳалок бўлди. Tesla вакилларининг қайд этишича, агар автомобиль тиркаманинг олди ёки орқа қисмига урилганида, хавфсизлик воситалари ҳайдовчининг жонини сақлаб қолиши мумкин эди.
Осмоннинг ёрқин фонида ҳайдовчи ҳам, автопилот ҳам тиркаманинг оқ қисмини кўрмаган ва шу сабабли тормоз ишлатилмаган. Компаниянинг айтишича, автопилот расман тест жараёнини ўтказмоқда. Машинани бошқаришда асосий масъулият ҳайдовчида қолади.
Tesla вакиллари ушбу ҳодиса юзасидан барча маълумотни NHTSA’га топширди. Бошқарма бўлиб ўтган воқеада автопилот ўзини тўғри тутган-тутмаганини баҳолайди ва Tesla автомобиллари чақиртириб олиши керак ёки керак эмаслигини аниқлайди.
Tesla ва компания раҳбари Илон Маск вафот этган ҳайдовчининг оиласига ҳамдардлик билдирди.
Изоҳ (0)