Бугун — 30 июнь куни Евро—2016 да чорак финал беллашувлари старт олади. Бу босқичдаги биринчи жуфтлик: Польша — Португалия.
Ҳар икки терма жамоа нимчорак финалда 120 дақиқадан тер тўкишга мажбур бўлди. Польша пенальтилар сериясига кўра Швейцарияни турнирдан чиқариб юборган бўлса, Португалия 117-дақиқада киритилган гол эвазига Хорватияга чиқиш эшикларини кўрсатиб қўйди.
Ўзаро ўйинлар
Бунда Португалиянинг кичик устунлигини кўриш мумкин. 10 та беллашувдан 4 тасида айнан улар зафар қучган, 3 тасида эса Польша. Тўплар нисбати 13:9, португалияликлар фойдасига.
L'Équipe
Франциянинг машҳур L'Équipe нашри чорак финал ўйинлари олдидан португалиялик уч нафар футболчи тўғрисида мақола чоп этди. Унда Рафаэль Геррера, Антонио Лопеш, Адриан Силва каби йигитларнинг Францияда таваллуд топгани кўрсатиб ўтилган. Маълум бўлишича, Францияга яшаш учун келиб қолган 4 миллионга яқин муҳожирнинг 1,2 миллиони португалияликлардир.
Мақолада келтирилишича, Адриан Силванинг отаси португалиялик, онаси эса франциялик бўлган. Футболчи 11 ёшига қадар Францияда яшаган, Португалияга кўчиб келишгачгина португал тилини ўзлаштиришни бошлаган.
Super Express
Польшанинг Super Express нашри эрта тонгдан терма жамоанинг собиқ юлдузи, оиласи кўп жиҳатдан Португалия билан боғлиқ бўлган Эузебиуш Смолярек билан интервьюни чоп этди. Футболчининг отаси Володзимеж Смолярек ўзи учун кумир деб билган португалиялик футболчи Эусебионинг шарафига ўғлини унинг исми билан атаган.
1986 йилги Жаҳон Чемпионатида Володзимеж Смолярек Португалия терма жамоаси дарвозасига киритилган ғалаба голига муаллифлик қилганди. Орадан 20 йил ўтиб унинг ўғли Эузебиуш Смолярек Евро—2008 саралаш босқичида Португалия терма жамоасини дарвозасини ишғол қилди. Криштиану Роналду ҳам ҳаракат қилган беллашувда Эби 2 та гол уриб, Польшанинг 2:0 ҳисобидаги ғалабасига ёрдам берганди. Бугун эса у ватандошларидан кимдир ўша муваффақиятни такрорлашига умид билдирган. Бу борада у Евро—2016 да ҳозирча гол урмаган Роберт Левандовски номини такрор ва такрор тилга олди.
La Provence
Марсель газеталаридан La Provence бугунги кун қаҳрамонлари сифатида икки жамоа етакчилари — Роналду ва Левандовскининг танлаб олди. Уларнинг бири 2 та гол ура олди, иккинчиси эса голлар ҳисобини очганича йўқ. Шунга қарамай Адам Навалка Робертнинг ўйинидан тўлиқ қониқиш ҳосил қилаётгани ҳақида айтиб ўтганди.
Ўйинолди фикрлар
Адам Навалка (Польша терма жамоаси бош мураббийи): — «Биз нималарга қодир эканимизни исботлаб бўлдик. Букмекер компаниялари Португалиянинг ғалабасига кўпроқ ишонмоқда. Биз ўз эса кучимизга ишонамиз ва мусобақада давом этишга ҳаракат қиламиз».Аркадиуш Милик (Польша терма жамоаси аъзоси): — «Биз Польшада нималар рўй бераётганини ҳис қилиб турибмиз. Яқинларимизнинг айтишича, терма жамоанинг муваффақиятидан бутун мамлакат қувонмоқда. Бизни шунча одам қўллаётганидан хурсандман. Мухлислар ишончини оқлашимиз керак».
Аркадиуш Милик «‘Аякс’»даги устози Деннис Бергкамп ҳақида жуда илиқ фикрлар билдириб, мана шу инсон унинг ўйинларини буткул ўзгартириб юборгани ҳақида тўхталди. «Мен ундан ҳам яхшироқ ўқитувчини топа олмасдим», — дейди футболчи.
Фернанду Сантуш (Португалия терма жамоаси бош мураббийи): — «Греция терма жамоасини бошқарганимда Евро—2012 очилиш учрашувида Польшага қарши кураш олиб борганимизни яхши эслайман. Ҳозирги таркибдаги Блашиковски, Левандовски каби футболчилар ўшанда ҳам бор эди. Тан олишим керак, польшаликлар яхши ўсишга эришди. Саралаш турнирида Германиянинг мағлуб этилгани бунга ишора. Бугунги ўйинда имкониятларни 50/50 баҳолайман».
Адриан Силва (Португалия терма жамоаси аъзоси): — «Биз Польшанинг гуруҳ босқичида қандай кучли эканини кўрдик, демак, осон бўлмайди. Айта оладиганим биз беллашувга руҳий ва жисмоний томондан тайёрмиз.
Адриан Силва жамоадоши Криштиану Роналдунинг ўйинлари ҳақида илиқ фикрлар билдирди: «Келинг, ростини айтаман, Криштиану Роналду бизга энг керакли футболчи. У ажойиб спорт формасида, гол уряпти, шунингдек, жамоа учун ҳам ишлаяпти».
Марсель
Ўйин бўлиб ўтадиган Марсель шаҳрида эрта тонгдан ажойиб об-ҳаво ҳукмрон бўлиб турибди. Франциянинг бу шаҳри Польша учун омадли. 1990 йил бу шаҳарда Польша БАА устидан 4:0 ҳисобида зафар қучганди. Евро—2016 доирасида эса Украинани 1:0 ҳисоби билан мағлуб этди.
Бу юриш Португалияга қарши ўйинда ҳам давом этармикин? Португалияликлар Европа Чемпионатлари доирасидаги сўнгги беш беллашувнинг асосий вақтини дуранг билан якунлади. 2012 йилги Еврода Испания билан 0:0 ҳисобида дуранг ўйнаб, пенальтилар сериясига кўра турнир билан хайрлашган Португалиянинг боши Евро—2016 да дуранглардан чиқмай қолди.
«Гладиатор» фильми орқали машҳурлик чўққисига чиққан киноактёр Рассел Кроу ҳам Польша — Португалия ўйини ҳақида тўхталиб ўтди: «Португалияда дўстларим борлигини билиб турсам ҳам, эртага қалбан Польша биланман. Олға, Польша».
Польша терма жамоаси аъзоси Аркадиуш Милик ўзининг фаcебоок саҳифасида шундай пост қолдирди: «Эртага бизда улкан иш бажаришнинг имкони бўлади. Келинг, буни биргаликда амалга оширамиз, бизни қўллаб туринг!»
Польша — Португалия ўйини 30 июнь куни Тошкент вақти билан 23:59 да бошланади. Беллашувни «UzReport» телеканали орқали Даврон Файзиев шарҳлаб боради.
Изоҳ (0)