Bugun — 30-iyun kuni Yevro—2016 da chorak final bellashuvlari start oladi. Bu bosqichdagi birinchi juftlik: Polsha — Portugaliya.
Har ikki terma jamoa nimchorak finalda 120 daqiqadan ter to‘kishga majbur bo‘ldi. Polsha penaltilar seriyasiga ko‘ra Shveysariyani turnirdan chiqarib yuborgan bo‘lsa, Portugaliya 117-daqiqada kiritilgan gol evaziga Xorvatiyaga chiqish eshiklarini ko‘rsatib qo‘ydi.
O‘zaro o‘yinlar
Bunda Portugaliyaning kichik ustunligini ko‘rish mumkin. 10 ta bellashuvdan 4 tasida aynan ular zafar quchgan, 3 tasida esa Polsha. To‘plar nisbati 13:9, portugaliyaliklar foydasiga.
L'Équipe
Fransiyaning mashhur L'Équipe nashri chorak final o‘yinlari oldidan portugaliyalik uch nafar futbolchi to‘g‘risida maqola chop etdi. Unda Rafael Gerrera, Antonio Lopesh, Adrian Silva kabi yigitlarning Fransiyada tavallud topgani ko‘rsatib o‘tilgan. Ma’lum bo‘lishicha, Fransiyaga yashash uchun kelib qolgan 4 millionga yaqin muhojirning 1,2 millioni portugaliyaliklardir.
Maqolada keltirilishicha, Adrian Silvaning otasi portugaliyalik, onasi esa fransiyalik bo‘lgan. Futbolchi 11 yoshiga qadar Fransiyada yashagan, Portugaliyaga ko‘chib kelishgachgina portugal tilini o‘zlashtirishni boshlagan.
Super Express
Polshaning Super Express nashri erta tongdan terma jamoaning sobiq yulduzi, oilasi ko‘p jihatdan Portugaliya bilan bog‘liq bo‘lgan Euzebiush Smolyarek bilan intervyuni chop etdi. Futbolchining otasi Volodzimej Smolyarek o‘zi uchun kumir deb bilgan portugaliyalik futbolchi Eusebioning sharafiga o‘g‘lini uning ismi bilan atagan.
1986-yilgi Jahon Chempionatida Volodzimej Smolyarek Portugaliya terma jamoasi darvozasiga kiritilgan g‘alaba goliga mualliflik qilgandi. Oradan 20 yil o‘tib uning o‘g‘li Euzebiush Smolyarek Yevro—2008 saralash bosqichida Portugaliya terma jamoasini darvozasini ishg‘ol qildi. Krishtianu Ronaldu ham harakat qilgan bellashuvda Ebi 2 ta gol urib, Polshaning 2:0 hisobidagi g‘alabasiga yordam bergandi. Bugun esa u vatandoshlaridan kimdir o‘sha muvaffaqiyatni takrorlashiga umid bildirgan. Bu borada u Yevro—2016 da hozircha gol urmagan Robert Levandovski nomini takror va takror tilga oldi.
La Provence
Marsel gazetalaridan La Provence bugungi kun qahramonlari sifatida ikki jamoa yetakchilari — Ronaldu va Levandovskining tanlab oldi. Ularning biri 2 ta gol ura oldi, ikkinchisi esa gollar hisobini ochganicha yo‘q. Shunga qaramay Adam Navalka Robertning o‘yinidan to‘liq qoniqish hosil qilayotgani haqida aytib o‘tgandi.
O‘yinoldi fikrlar
Adam Navalka (Polsha terma jamoasi bosh murabbiyi): — “Biz nimalarga qodir ekanimizni isbotlab bo‘ldik. Bukmeker kompaniyalari Portugaliyaning g‘alabasiga ko‘proq ishonmoqda. Biz o‘z esa kuchimizga ishonamiz va musobaqada davom etishga harakat qilamiz”.Arkadiush Milik (Polsha terma jamoasi a’zosi): — “Biz Polshada nimalar ro‘y berayotganini his qilib turibmiz. Yaqinlarimizning aytishicha, terma jamoaning muvaffaqiyatidan butun mamlakat quvonmoqda. Bizni shuncha odam qo‘llayotganidan xursandman. Muxlislar ishonchini oqlashimiz kerak”.
Arkadiush Milik “‘Ayaks’”dagi ustozi Dennis Bergkamp haqida juda iliq fikrlar bildirib, mana shu inson uning o‘yinlarini butkul o‘zgartirib yuborgani haqida to‘xtaldi. “Men undan ham yaxshiroq o‘qituvchini topa olmasdim”, — deydi futbolchi.
Fernandu Santush (Portugaliya terma jamoasi bosh murabbiyi): — “Gretsiya terma jamoasini boshqarganimda Yevro—2012 ochilish uchrashuvida Polshaga qarshi kurash olib borganimizni yaxshi eslayman. Hozirgi tarkibdagi Blashikovski, Levandovski kabi futbolchilar o‘shanda ham bor edi. Tan olishim kerak, polshaliklar yaxshi o‘sishga erishdi. Saralash turnirida Germaniyaning mag‘lub etilgani bunga ishora. Bugungi o‘yinda imkoniyatlarni 50/50 baholayman”.
Adrian Silva (Portugaliya terma jamoasi a’zosi): — “Biz Polshaning guruh bosqichida qanday kuchli ekanini ko‘rdik, demak, oson bo‘lmaydi. Ayta oladiganim biz bellashuvga ruhiy va jismoniy tomondan tayyormiz.
Adrian Silva jamoadoshi Krishtianu Ronalduning o‘yinlari haqida iliq fikrlar bildirdi: “Keling, rostini aytaman, Krishtianu Ronaldu bizga eng kerakli futbolchi. U ajoyib sport formasida, gol uryapti, shuningdek, jamoa uchun ham ishlayapti”.
Marsel
O‘yin bo‘lib o‘tadigan Marsel shahrida erta tongdan ajoyib ob-havo hukmron bo‘lib turibdi. Fransiyaning bu shahri Polsha uchun omadli. 1990-yil bu shaharda Polsha BAA ustidan 4:0 hisobida zafar quchgandi. Yevro—2016 doirasida esa Ukrainani 1:0 hisobi bilan mag‘lub etdi.
Bu yurish Portugaliyaga qarshi o‘yinda ham davom etarmikin? Portugaliyaliklar Yevropa Chempionatlari doirasidagi so‘nggi besh bellashuvning asosiy vaqtini durang bilan yakunladi. 2012-yilgi Yevroda Ispaniya bilan 0:0 hisobida durang o‘ynab, penaltilar seriyasiga ko‘ra turnir bilan xayrlashgan Portugaliyaning boshi Yevro—2016 da duranglardan chiqmay qoldi.
“Gladiator” filmi orqali mashhurlik cho‘qqisiga chiqqan kinoaktyor Rassel Krou ham Polsha — Portugaliya o‘yini haqida to‘xtalib o‘tdi: “Portugaliyada do‘stlarim borligini bilib tursam ham, ertaga qalban Polsha bilanman. Olg‘a, Polsha”.
Polsha terma jamoasi a’zosi Arkadiush Milik o‘zining facebook sahifasida shunday post qoldirdi: “Ertaga bizda ulkan ish bajarishning imkoni bo‘ladi. Keling, buni birgalikda amalga oshiramiz, bizni qo‘llab turing!”
Polsha — Portugaliya o‘yini 30-iyun kuni Toshkent vaqti bilan 23:59 da boshlanadi. Bellashuvni “UzReport” telekanali orqali Davron Fayziyev sharhlab boradi.
Izoh (0)