Франциянинг шарқий қисмида жойлашган Энсисхайм шаҳридаги қамоқхона маҳбуси ушбу муассасанинг руҳшуносини гаровга олди. Бу ҳақда маҳаллий ОАВларга таяниб, «ТАСС» хабар бермоқда.
«Айни дамда мен руҳшуносни унинг бўйнига пичоқ тираб турган ҳолда гаровда ушлаб ўтирибман. Бу қилмишим учун жазо муддати қўшилишини биламан, аммо менинг ишим ҳақида ОАВ билишини истайман», – дея маълум қилди маҳбус маҳаллий Dernières Nouvelles d’Alsace нашри журналистларига.
Нашрнинг қайд этишича, мазкур воқеа сабабчиси 27 ёшли Микаэль Гильгенманн. У ўз хатти-ҳаракатларини «қамоқхона маъмуриятининг муносабатига қарши норозилик» дея изоҳлади.
Маҳбуснинг айтишича, қамоқхона соқчилари шу йилнинг май ойида вафот этган отаси билан муносиб тарзда хайрлашишга имкон бермаган. «Отам билан хайрлашиш учун ўликхонада икки соат бўлишимга рухсат берилганди, лекин у ерда атиги 20 дақиқа бўлдим. Қўшимчасига, унинг тобутига яқинлаштиришмади. Мен ҳеч қандай муаммо келтириб чиқармаган бўлсам-да, жандармлар у ердан кетишга мажбурлади», – деди Микаэль Гильгенманн.
Қайд этиш жоизки, 27 ёшли маҳбус ўғриликлар учун муқаддам судланган. У Франция шарқидаги қамоқхоналарда икки марта гаровга олишни амалга оширмоқчи бўлган. Ҳозирги вақтда жандармлар воқеа жойида бўлиб турибди.
Изоҳ (0)