Ўзбекистонда алкоголь ва тамаки сотувчилари харидорлар ёшини аниқлаштириши керак бўлади

Ўзбекистон ҳукумати 10 июндаги қарори (pdf) билан мамлакатда чакана савдо қоидаларига ўзгартиришлар киритди, деб ёзади «Газета.uz».

Энди алкоголли маҳсулотларни ва тамаки маҳсулотларини сотаётган сотувчи кўриниши йигирма ёшдан кичик кўринган харидордан унинг ёшини тасдиқловчи ҳужжатни кўрсатишни талаб қилиши, ҳужжат мавжуд бўлмаган тақдирда эса алкоголли маҳсулотларни ва тамаки маҳсулотларни сотишни рад этиши шарт.

Шунингдек, алкоголь ва тамаки маҳсулотларини савдо автоматлари орқали сотиш ҳамда алкоголь ва тамаки маҳсулотларига ўхшаш кўринишдаги болалар ўйинчоқлари ва ширинликларини сотиш тақиқланди.

Алкоголли маҳсулотларни, сотиш жойларида алкоголли ичимликлар 20 ёшга тўлмаган шахсларга сотилмаслиги ҳамда алкоголли маҳсулотлар ва тамаки маҳсулотларининг инсон соғлиғига салбий таъсири тўғрисида огоҳлантирувчи ёзувлар бўлмаганда, сотиш тақиқланди.