Тошкентнинг «Пахтакор» футбол клуби собиқ бош мураббийи Нўъмон Ҳасанов «Қўқон-1912» жамоасига бош мураббий этиб тайинланди. Бу ҳақда «Қўқон-1912» матбуот хизмати хабар бермоқда.
Ўзбекистон Олий Лигаси 10-турида «Пахтакор» «Нефтчи»дан 1:2 ҳисобида енгилган эди. Шундан сўнг, «Пахтакор» бош мураббий Нўъмон Ҳасановнинг истеъфо сўраб ёзган аризасини қаноатлантирганди.
«Қўқон-1912» жамоасининг бугун, 11 июнь куни навбатдан ташқари бўлиб ўтган йиғилишида Қўқон шаҳар ҳокими Абдуллаев Акрамжон, вилоят ҳокимлиги вакили Турдиматов Маъруфжон ҳамда клуб аъзолари иштирокида бош мураббий масаласи кўриб чиқилди. Унга кўра, Қўқон футболи тарбияланувчиси, ўзбек футболининг афсоналаридан бири Нўъмон Ҳасанов «Қўқон-1912» жамоасининг бош мураббийи этиб тайинланди.
Қайд этиш жоиз, «Қўқон-1912» бош мураббийи сифатида мавсумни Мурод Исмоилов бошлади. Исмоилов истеъфога чиқарилгач, унинг ўрнини Сергей Ковшов эгаллаган, жамоа натижаларига масъул этиб Тоҳир Кападзе тайинланганди. Мурод Исмоилов эса собиқ жамоаси – «Нефтчи»га қайтган.
Нўъмон Ҳасанов учун «Қўқон-1912» жамоаси бегона эмас. 2003 йилда мутахассис ушбу клубда ўйновчи мураббий сифатида фаолият юритган.
Изоҳ (0)