2016 йилнинг 5–21 август кунлари Бразилиянинг Рио-де-Жанейро шаҳрида бўлиб ўтадиган Олимпиада ўйинларининг теннис спорт тури бўйича саралаш тизими якунига етди ва ўзбекистонлик Денис Истомин Рио–2016 Олимпиада ўйинларига йўлланма олди, деб хабар бермоқда «Sports.uz».
Айни пайтда Профессионал теннисчилар уюшмаси (ATP) рейтингида 64-поғонада бораётган Денис Истомин олимпия рейтингининг 38-қаторида қайд этилиб, тўрт йилликнинг энг нуфузли мусобақасида иштирок этиш ҳуқуқига эга бўлди.
Теннисда Олимпиада иштирокчилари жаҳон рейтингидаги ўрнига асосан аниқланади. Қоидага кўра, Олимпиада ўйинларининг теннис мусобақасида бир мамлакатдан энг кўпи тўртта теннисчи ва иккита жуфтлик қатнашиши мумкин.
Қайд этиш жоиз, Денис Истомин 2012 йили Лондонда бўлиб ўтган Олимпиада ўйинларида ҳам иштирок этиб, дастлабки икки учрашувда испаниялик Фернандо Вердаско ва люксембурглик Жиль Мюллерни мағлубиятга учратган эди. Учинчи босқичда эса у бўлажак финалчи, швейцариялик Рожер Федерерга ютқазиб қўйганди.
Шундай қилиб, ўзбекистонлик спортчилар томонидан Олимпиада ўйинларига 12 та спорт федерациясининг 15 та спорт туридан жами 53 та йўлланма қўлга киритилди. 53 та Олимпиада йўлланмалари бўйича 56 нафар ўзбекистонлик спортчи Рио—2016 Олимпиадасида иштирок этади. Ситора Ҳамидова (енгил атлетика) ва Раънохон Аманова (сузиш) иккитадан йўлланмага эга. Байдарка ва каноэда эшкак эшиш ҳамда бадиий гимнастика спорт турларида ўзбекистонлик спортчилар жамоавий баҳсларда қатнашади.
Изоҳ (0)