Перуда 5 июнь, якшанба куни бўлиб ўтган президентлик сайловларининг иккинчи турида мамлакатнинг собиқ бош вазири Педро Кучински етакчилик қилмоқда. Бу ҳақда «РБК» хабар бермоқда.
Сайловчилар овозларининг 52 фоизи ҳисоб-китобига кўра, Кучински учун уларнинг 50,59 фоизи овоз берган. Унинг рақиби, ҳозирда қамоқда бўлган Перунинг собиқ президенти Альберто Фухиморининг қизи, Кейко Фухимори эса 49,41 фоиз овоз тўплади.
77 ёшли Кучински иқтисодий дастурни илгари сурмоқда. Сайловолди кампаниясида у молиявий соҳадаги халқаро тажрибасини иқтисодий ўсишга кўмак бериш учун қўллашини маълум қилган эди.
Кейко Фухимори апрель ойида бўлиб ўтган сайловларнинг биринчи турида ғолиб бўлган эди. У ўзининг асосий йўналиши сифатида жиноятчиликка қарши курашни танлаган. Унинг отаси Альберто Фухимори инсониятга қарши жиноятлари учун 2009 йилда 25 йилга қамоқ жазосига ҳукм қилинган.