Ҳиндистонлик бодибилдер, 1952 йилда «Коинот эркаги» номини қўлга киритган Манохар Айч Калькуттада 104 ёшида вафот этди, дея хабар бермоқда «РИА Новости» маҳаллий ОАВларга таяниб.
Мустақил Ҳиндистон тарихида биринчи бўлиб «Коинот эркаги» номига эга бўлган спортчи 5 июнь, якшанба куни оламдан ўтди. Айчнинг ўғли сўзларига кўра, у «қарилик хасталиклари» туфайли вафот этган.
Айчнинг спорт билан танишуви 1942 йилда Қироллик ҳарбий-ҳаво кучларига кириши билан бошланган. Британияга қарши намойишларда қатнашиб, қамоққа тушгач, куч ишлатиладиган машқлар билан жиддий шуғулланишга киришган.
100 ёшга тўлган вақтида Айч «Коинот эркаги» номининг яна бир совриндори — Арнольд Шварценеггер билан шахсан таниша олмаганидан афсусда эканлигини айтган эди.