«Барселона» жамоаси ҳужумчиси Лионель Мессининг отаси билан шерикликда солиқ тўлашдан бўйин товлаши билан боғлиқ суд эшитувлари доирасида прокурор футболчини оқлаш керак деб ҳисоблашини айтди. Бу ҳақда «ТАСС» хабар бермоқда.
Суд залидаги чиқишида прокурор Ракель Амадо солиқ тўлашдан бўйин товлашда асосий айб Лионелнинг отаси — Хорхе Орасио Мессида эканлигини таъкидлаб ўтди.
«Фирибгарлик унинг отаси қабул қилган қарорлар туфайли содир этилди», — деди Амадо.
Прокурор катта Мессини бир ярим йилга озодликдан маҳрум қилишни сўрамоқда. Аммо судда яна бир томон — давлатнинг манфаатларини ҳимоя қилаётган адвокат ҳам бўлиб, у отани ҳам, ўғилни ҳам 22 ойга озодликдан маҳрум қилишни сўрамоқда. Аммо, маҳаллий қонунчиликка мувофиқ, жавобгар биринчи марта жиноят содир этаётган бўлса, унга белгиланган муддат икки йилдан ошмаса, у жазони қамоқда ўташдан озод қилиниши мумкин.
Аргентиналик спортчи ва унинг отаси 2007–2009 йилларда 4,1 миллион евро миқдоридаги солиқни тўлашдан бўйин товлашда айбланмоқда. Кеча, 2 июнь куни Месси, суд олдида жавоб бераркан, молиявий масалалардан мутлақо бехабар бўлиб, фақат футбол ўйнашга эътибор қаратганини айтган эди. Шунингдек, унинг отаси айбини қисман тан олди.
Изоҳ (0)