«Таътил вақтида сафар қилмоқчимисиз? Қуйида уни қўшни Ўзбекистонда ўтказиш учун сабаблар келтирилган, у ерга сафарингиз арзон, аммо қизиқарли ва тўкин-сочин бўлади», — деб бошланади «365info.kz» нашри эълон қилган мақола.
1.Тошкентдаги Қалдирғочбий мақбараси
Қозоғистон жануби ва Тошкент вилоятида яшовчи қозоқлар Тошкентдаги Қалдирғочбий (у Толебий деб ҳам аталади) мақбарасини жуда қадрлайди. Бино XV асрда пишиқ ғиштдан қурилган бўлиб, у қозоғистонлик бий Толебий шарафига номланган. У Катта Ўрда ҳукмдори бўлган ва халқ орасида «Қалдирғоч» исмига эга бўлган.
2. Самарқанддаги Ялангтўш баҳодир мадрасаси
Қозоқлар учун энг аҳамиятли зиёратгоҳ Самарқанд марказидаги Регистон мажмуасида жойлашган, бу ХVII асрга тегишли Тиллақори мадрасасидир. Унинг қурилиши 1646 йилда Самарқанд ҳокими Ялангтўшбий баҳодир буйруғи билан бошланган. Ялангтўшбий қозоқ ва ўзбек халқлари тарихининг бир бўлаги ҳамда уларнинг фахри ҳисобланади.
3. Самарқанддаги имом Исмоил ал Бухорий мажмуаси
Самарқанддан 12 км масофада илоҳиётчи, ҳадисшунос олим имом Исмоил ал Бухорийнинг тарихий мажмуаси жойлашган. Мажмуа ичидаги музейда дунёнинг қатор мамлакатлари раҳбарлари томонидан ҳадя этилган муқаддас Қуръон намуналари кўргазмага қўйилган. Қозоқларга Нурсултон Назарбоев томонидан совға қилинган Қуръонни кўриш қизиқ бўлса, ажаб эмас.
4. Бухоронинг етти пири
Бухородаги маҳаллий гидлар қозоғистонлик сайёҳлар Бухоро етти пири муршидини зиёрат қилишни жуда ёқтиришини айтади. Бу Нақшбандия таълимоти буюк суфийларининг еттита қабри зиёратидан иборатдир.
5. Хўжа Насриддин — қозоқларнинг Алдар Кўсаси
Бухорода Хўжа Насриддин ҳайкалини кўриш мумкин. Синчиклаб қарасангиз, у ўзининг қозоқ «касбдоши» Алдар Кўсага жуда ўхшашини пайқаш мумкин. Хўжа Насриддин ва Алдар Кўса ҳақидаги латифаларнинг мазмуни ҳам бир-бирига жуда ўхшайди.
6. Нуротадаги Айтекий Бий мақбараси
Навоий вилоятининг Нурота шаҳрида жойлашган Айтекий Бий мақбараси зиёратчилар орасидаги энг машҳур жойлардан бири. Бу ерга қозоқларнинг Кичик Жуз хонлиги Алчин қабиласидан бўлган Айтекий Бий дафн этилган. У ўз даврининг энг саводли кишиси ҳисобланган. Самарқанддаги Улуғбек мадрасасида, сўнг Шердор мадрасасида ўқиган. 20 ёшида Бухоро ва Самарқандда қозоқ, ўзбек ва қорақалпоқларнинг бир қисмига бийлик қилган.
7. Нукусдаги Савицкий музейи
Қорақалпоғистон пойтахтидаги Савицкий музейида ХХ асрнинг 20—30 йилларига тегишли рус авангардининг аҳамияти бўйича иккинчи ўринда турувчи коллекцияси сақланади. Шунингдек, музейда қозоқлар билан қариндошлик алоқаларига эга бўлган қорақалпоқ халқи санъати ва маданиятига бағишланган ноёб экспозиция мавжуд.
8. Қайси қозоқ ошни севмайди?
Тошкентга келган қозоғистонлик дарҳол ҳақиқий паловни қаерда татиб кўриш мумкинлиги билан қизиқади. Тошкентда қозоғистонлик меҳмонларни энг йирик «ош маркази» кутиб олади. У ерда бешта улкан қозонда пойтахтнинг беш нафар маҳоратли ошпази ош пиширади.
Изоҳ (0)