Футбол бўйича Ўзбекистон Олий Лигасида 10-турнинг олти учрашуви ўз якунига етди. Унинг иккинчи рақамли марказий беллашуви Тошкентда ўтиб, «Пахтакор» ва «Нефтчи» клублари ўртасидаги тўқнашувда Фарғона клубининг қўли баланд келди.
Беллашувнинг 20-дақиқасига келиб бош ҳакам Азиз Асимов «Нефтчи» футболчиси Алишер Саматовга иккинчи сариқ карточкани кўрсатди ва уни майдондан четлатди. Шунга қарамай ҳисоб меҳмонлар томонидан биринчи бўлимнинг ўзида очилди.
Иккинчи таймда майдонга тушган Жалолиддин Машариповга ҳисобни тенглаштириш учун олти дақиқа кифоя қилди. Бироқ «Пахтакор» дуранг натижани ҳам ушлаб қола билмади. 79-дақиқада Отабек Исроилов ўз номини таблога ёздириб, мавсум бошидан буён «Нефтчи»нинг сафардаги иккинчи ғалабасини таъминлаб берди.
«Chempionat.asia» маълумотига кўра, «Нефтчи» сўнгги бор 2001 йилда «Пахтакор» майдонидан ғалаба билан қайтган бўлиб, шундан кейинги 14 йил давомида Тошкент клуби мунтазам ғалаба қозониб келган.
10-турнинг энг марказий ўйинида «Насаф» ва «Бунёдкор» клублари ўзаро дуранг ўйнади. Қарши шаҳрида кечган беллашувнинг 51-дақиқасида «қалдирғочлар» ҳисобда олдинга чиқиб олган бўлса, 64-дақиқада Эркин Бойдуллаев мувозанатни тиклади. «Бунёдкор» 83-дақиқадан бошлаб майдонда бир киши кам қолганига қарамай, сафардан 1 очко билан қайтишни уддалади.
Навоий шаҳрида кечган ўйинда «Қизилқум» ва «Металлург» клублари ҳам 2 очкодан йўқотди. Қайд этиш керак, мазкур тур Олий Лига дебютанти «Обод» клубининг мавсумдаги биринчи ғалабаси билан старт олганди.
28 май ҳолатига кўра «Бунёдкор» 26 очко билан турнир жадвалида пешқадам бўлиб турибди. Ундан бир очко камроқ тўплаган «Локомотив» 10-турни 30 май куни Қўқон шаҳрида ўтказади. «Насаф» ҳисобида 23 очко бор.
Олтинчи ўринда бораётган «Пахтакор» 10 та ўйиннинг олтитасида очко йўқотди ва унинг ҳисобида 15 очко мавжуд. 29 май куни «Бухоро» клуби ўз майдонида «Навбаҳор»ни мағлуб эца ёки дуранг ўйнаса, турнир жадвалида «Пахтакор»дан ўзиб кетади.
Ўзбекистон Олий Лигаси 10-тур беллашувлари 27 май, жума
«Обод» — «Сўғдиёна» 2:1
Голлар: Шоҳруз Норхонов, 11 (1:0). Санжар Рашидов, 26 (1:1). Шоҳруз Норхонов, 82 (2:1).28 май, шанба
«Андижон» — «Шўртан» 1:3
Голлар: Маъруфхон Муродов, 29 (0:1). Неманя Ёванович, 52-пен (1:1). Игорь Таран, 57-пен (1:2). Зафар Полвонов, 59 (1:3).«Олмалиқ» — «Машъал» 1:0
Гол: Рўзимбой Аҳмедов, 60 (1:0).Ноаниқ пенальти: Рўзимбой Аҳмедов, 35 (О).«Пахтакор» — «Нефтчи» 1:2
Голлар: Мурод Бобожонов, 39 (0:1). Жалолиддин Машарипов, 67 (1:1). Отабек Исроилов, 79 (1:2).Четлатиш: Алишер Саматов, 20 (Н).«Қизилқум» — «Металлург» 1:1
Голлар: Зоҳид Абдуллаев, 10 (0:1). Алишер Юсупов, 90 (1:1).«Насаф» — «Бунёдкор» 1:1
Голлар: Шаҳзод Нурматов, 51 (0:1). Эркин Бойдуллаев, 64 (1:1).Четлатиш: Отабек Шукуров, 83 (Б).29 май, якшанба«Бухоро» — «Навбаҳор»
30 май, душанба«Қўқон—1912» — «Локомотив»
Изоҳ (0)