Ўзбекистон Республикаси хусусийлаштириш, монополиядан чиқариш ва рақобатни ривожлантириш давлат қўмитасида Япониянинг «Номура» тадқиқот институти вакиллари билан учрашув бўлиб ўтди. Бу ҳақда қўмита матбуот хизмати хабар бермоқда.
Қўмита раиси Даврон Ҳидоятов иштирокидаги учрашувда JICA (Япония халқаро ҳамкорлик агентлиги) сўровига кўра ўтказилаётган тадқиқотлар доирасида Ўзбекистонда инфраструктуравий ривожланиш масалалари муҳокама қилинди.
«Номура» вакиллари Ўзбекистонда давлат активларини хусусийлаштиришга инвестиция киритиш истагидаги япон компанияларига кўмак бериш, бу борада қўмита билан фаол ҳамкорлик қилиш истагини билдирди. Ўз навбатида, қўмита раҳбарияти институт билан мамлакатдаги хусусийлаштирилаётган объектларга япон компаниялари инвестицияларини жалб этишда ҳамкорликка тайёр эканлигини таъкидлаб ўтди. Томонлар учрашувда кўтарилган масалалар юзасидан келгусида доимий мулоқотда бўлиш ҳақида келишиб олди.
Маълумот учун, «Номура» 50 йилдан ортиқ вақтдан бери ҳукумат идоралари ва хусусий буюртмачиларга хизмат кўрсатиб келаётган Япониядаги йирик хусусий консалтинг компанияси бўлиб, мамлакатдан ташқари, АҚШ, Россия, Хитой ва бошқа давлатлардаги 20 дан ошиқ филиалларда фаолият кўрсатадиган 8 мингдан зиёд ходимга эга.
Изоҳ (0)