iPad Pro фойдаланувчилари iOS’ни янгилагандан сўнг планшетлар қотиб қолаётганидан шикоят қилди

9,7 дюймли iPad Pro фойдаланувчилари қурилмаларини iOS 9.3.2 версиясигача янгилаш чоғида носозликлар юзага келаётганидан шикоят қилди, деб ёзади TJournal.

Янги планшетларнинг баъзи фойдаланувчилари таъкидлашича, сўнгги янгиланма ўрнатилганидан кейин тизим тезда юкланишдан тўхтаган, бунинг ўрнига экранда «Қурилмани iTunes’га уланг» деган хабар пайдо бўлган, бироқ iOS’ни iTunes орқали қайта тиклаш муаммони бартараф этмаган.

MacRumors маълумотларига кўра, бу муаммо iPad Pro 9,7’нинг барча эгаларида ҳам кузатилмаган, аммо ижтимоий тармоқлардаги шикоятлар сонига қараганда, у кенг тарқалган.

Вазият «56-хатолик» сифатида маълум бўлиб, у ускуналардаги муаммолар билан боғлиқ. У юзага келгудек бўлса, компания iTunes’нинг энг янги версиясини ўрнатишни, сўнг оригинал Lightning кабелидан фойдаланиб, қурилмани қайта тиклашга икки марта уриниб кўришни тавсия қилади. Агар бу ҳам ёрдам бермаса, Apple кўмак марказига мурожаат қилиш маслаҳат берилади.