Азим Ахмедхаджаев «Асака» банки бошқаруви раиси этиб тайинланди. Бу ҳақдаги қарор, «Газета.uz» хабарига кўра, Ўзбекистон Вазирлар Маҳкамаси томонидан 11 май куни имзоланган.
1979 йилда туғилган Азим Ахмедхаджаев 2011 йилдан бери Ўзбекистон Ташқи иқтисодий фаолият Миллий банки бошқарув раиси биринчи ўринбосари сифатида ишлаб келаётган эди.
Банк тизимида 2003 йилдан бери ишлаб келаётган Ахмедхаджаев Тошкент давлат иқтисодиёт университети битирувчиси ҳисобланади (2000 йил — бакалавр: «Халқаро иқтисодий алоқалар», 2002 йил — магистр: «Халқаро валюта-кредит муносабатлари»).
«Асака» банкининг аввалги раҳбари Қаҳрамон Арипов эди. У 2007 йил апрелидан 2016 йил февралига қадар банкка раҳбарлик қилди.
1995 йили ташкил этилган «Асака» банки Ўзбекистоннинг энг катта иккинчи тижорий банки ҳисобланади. Унинг асосий акциядорлари — Молия вазирлиги (54 фоиздан ортиқ), «Ўзавтосаноат» компанияси (қарийб 13 фоиз), Ўзбекистон Тикланиш ва тараққиёт жамғармаси (қарийб 13 фоиз), Олмалиқ ва Навоий кон-металлургия комбинатлари, Бухоро нефтни қайта ишлаш заводи ва «Ўзбекистон темир йўллари» компаниясидир.
Банк сайти маълумотларига кўра, 1 апрель ҳолати бўйича банкнинг жами активлари 8,1 триллион сўмни, капитали ҳажми эса 955,7 миллиард сўмни ташкил этади.
Изоҳ (0)