Англия чемпионатининг сўнгги 38-туридан ўрин олган «Манчестер Юнайтед» – «Борнмут» учрашуви «Олд Траффорд»нинг Шимоли-Ғарбий қисмидаги секторларидан бирида топилган шубҳали пакет туфайли қолдирилгани ҳақида хабар берилган эди. Пакетнинг ичидаги буюм портловчи қурилмага ўхшаш муляж — ўқув-тайёргарлик мосламаси бўлиб чиқди, деб хабар беради «Чемпионат».
Мазкур қурилмани қидирув итларини тайёрлаш билан шуғулланувчи шахсий компания унутиб қолдирган. Хавфсизлик нуқтаи назаридан учрашув бекор қилиниб, мухлислар эвакуация қилинган эди.
«Манчестер Юнайтед» учрашувининг қолдирилгани ва абонемент эгаларига товон пулини тўлаши учун 3 миллион фунт сарфлайди.Манкунианларнинг Twitter’даги расмий саҳифасида маълум қилинишича, «Манчестер Юнайтед» – «Борнмут» учрашуви 17 май куни, маҳаллий вақт билан 20:00, Тошкент вақти билан эса 18 майга ўтар кечаси 00:00 да бошланади.
Қайд этиш жоиз, Чемпионлар Лигасининг сўнгги йўлланмаси учун кураш олиб борган Манчестер клубларидан «Сити» сўнгги турда «Суонси» билан 1:1 ҳисобида дуранг ўйнади. Қўлга киритилган 1 очко Мануэль Пеллегрини жамоасига ЕЧЛга йўлланма берувчи тўртинчи поғонани 99 фоизга кафолатлади. Яна бир фоиз имкониятдан фойдаланиб қолиш учун «Юнайтед» бўлажак ўйинда «Борнмут»ни 19 та гол фарқи билан мағлуб этиши керак бўлади.
Изоҳ (0)