Тошкент шаҳри чорраҳаларига ўрнатилган кузатув камералари ёзиб олган йўл-транспорт ҳодисаларининг қисқа жамланмаси Mover видеохизматига жойлаштирилди. Бу ҳақда Facebook’даги «Водители Ташкента (Drivers.uz)» гуруҳида хабар қолдирилган.
Видеожамланмага 2016 йилнинг 20 январидан 23 мартигача бўлган даврда юз берган қатор йўл-транспорт ҳодисалари киритилган. Улар орасида, жумладан, 23 март куни Тарас Шевченко ва Нукус кўчалари кесишмасида Chevrolet Captiva ва Nissan Altima автомобиллари иштирокида юз берган авария ҳам бор.
Видеода кўрсатилган йўл-транспорт ҳодисалари асосан икки сабаб билан — бир гуруҳ авариялар қарама-қарши қатнов қисмидаги автомобилга йўл бермаслик оқибатида, иккинчи тур ЙТҲлар эса светофорнинг тақиқловчи қизил чироғи талабига бўйсунмай, ҳаракатланиш натижасида содир бўлган. Баъзи авариялар сабаб, йўл инфратузилмаси объектлари — светофор ва панжараларга зарар етказилган.
Аввалроқ, 2016 йилнинг январида Тошкентдаги 100 дан ортиқ катта чорраҳалар видеофиксация воситалари билан таъминлангани ҳамда улар синов тартибида ишга тушгани маълум қилинган эди. Ўзбекистон Ички ишлар вазирлиги Йўл ҳаракати хавфсизлиги бош бошқармаси матбуот хизмати раҳбари муовини Мансур Риҳсиевнинг «Дарё»га маълум қилишича, «фото- ва видеофиксация воситалари орқали аниқланган қоидабузарликларга нисбатан жарималар қўллаш амалиёти тўлиқ тартибда ишга тушишидан 10 кун аввал бу ҳақда ОАВ орқали жамоатчиликка ахборот берилади».
Изоҳ (0)