Бир муддат аввал ижтимоий тармоқларда Андижон машинасозлик институти талабалари «Қалдирғоч» номли электромобил яратгани ҳақида фотохабарлар пайдо бўлган эди. «Qalampir.uz»нинг ёзишича, ишланма аслида Ойбек Умаровга тегишли ва у институтда ўқимайди.
Ойбек 1989 йили Андижонда туғилган, 2008 йили Андижон компьютер технологиялари касб-ҳунар коллежини тамомлаган. У оиладаги уч фарзанддан бири, ёлғиз ўғил. Отаси — иккинчи гуруҳ ногирони, онаси — Андижон Бандликка кўмаклашиш марказида ишлайди. Бир неча бор олий ўқув муассасаларига кириш учун ҳужжат топширган, шартнома асосида ўқишга қабул қилинган ҳам. «Бироқ шартнома пулини тўлашга имкониятим бўлмагани сабаб ўқишни ташлаб кетдим», — дейди айни вақтда Андижон машинасозлик институтида лаборант бўлиб ишлаётган Ойбек.
Маълум бўлишича, у ўз электромобилини 2013 йили ишлаб чиққан (бундан аввалроқ эса кам бензин сарфлайдиган автомобиль ишланмасини тайёрлаган; айтишларича, 2015 йили қуёш энергияси орқали ҳаракатланадиган автомобиль прототипини яратган). Электромобил кузови темир профил ва пўлатдан тайёрланган. Унга электродвигатель ва аккумлятор ўрнатилган. Энг юқори тезлиги соатига 50 километр бўлган мазкур намуна тўрт соатда тўлиқ қувватлантирилади ва бу қувват билан 100 километр йўл боса олади.
Ойбекнинг қайд этишича, унинг ишланмасига чет элликлар қизиқиш билдирган. «Электромобилнинг ишланмасини сўраб, кўп мамлакатлардан таклифлар тушди. Шартнома имзоламоқчи бўлганлар ҳам бўлди. Лекин она юртим бағрида яратган ихтиромни бошқа мамлакатларга сотмоқчи эмасман», — дея Ойбек Умаровнинг сўзларидан иқтибос келтирмоқда «Qalampir.uz». Ўзбекистонда ҳам кимдир унинг ишланмасига қизиқиш билдирганми-йўқми, буниси номаълум.
Ойбек Умаров ўз ихтироси учун Ўзбекистон Intellэктуал мулк агентлигидан тегишли патент олишга ҳаракат қилган. «Ўтган йили патент олиш учун барча ҳужжатларни тақдим этгандим. Афсуски, тўланиши керак бўлган маблағни топа олмаганим учун бу ишлар ҳам чала қолди», — дейди 27 ёшли йигит. Ёш ихтирочининг сўзарига кўра, у ўзи яратган «Қалдирғоч» электромобилини Андижон шаҳрида ҳар куни миниб юради (бунга йўл ҳаракати хавфсизлиги хизмати ходимлари қандай муносабат билдираётганига «Qalampir.uz» хабарида ойдинлик киритилмаган).