Эквадорда қутқарувчиларга Педерналес шаҳри ҳудудида содир бўлган вайронкор зилзиладан сўнг харобалар остидан етти кишини қутқаришда ёрдам берган Дайко лақабли ит 22 апрель, жума куни сувсизликдан вафот этди, дея хабар бермоқда «ТАСС».
Тўрт ёшли лабрадор тўрт кун давомида табиий офат ҳудудида ишлаб, қулаб тушган бинолар тагида қолган кишилар жойини аниқлаган. Итнинг шарофати билан қутқарувчилар харобалар остидан етти кишини тирик ҳолда топишга муваффақ бўлган. Бироқ ёнғин-қутқарув бўлинмаси Ибарра шаҳридаги ҳарбий бўлимга қайтиб келгач, ит ҳушини йўқотди ва ветеринар шифокорларнинг уни ҳушига келтиришга уринишларига қарамай, вафот этди.
Ўт ўчирувчилар ўзларининг Facebook’даги саҳифасида маълум қилишича, ит Тинч океани қирғоқларидаги жазирамада ўтказилган узлуксиз қутқарув операциясидан сўнг сувсизликдан вафот этган.
Эслатиб ўтамиз, олдинроқ Эквадорда 16 апрель куни юз берган 7,8 магнитудали зилзиладан сўнг яна 714 та такрорий ер силкиниши қайд этилгани билдирилганди. 23 апрель куни эса Эквадор қирғоқларида 5,8 магнитудали зилзила рўй берди.
Изоҳ (0)