Тошкентдаги трамвай деполари кимошди савдосига қўйилади

Пойтахтда трамвай йўналишлари тўлиқ ёпилиши туфайли, «Тошкент трамвайи» унитар корхонаси биноси ва иншоотлари кимошди савдоларида сотиб юборилади, деб ёзади «Газета.uz» Вазирлар Маҳкамасининг 5 апрелдаги «Тошкент шаҳридаги транспорт инфратузилмасини янада такомиллаштиришнинг қўшимча чора-тадбирлари тўғрисида»ги қарорига таяниб.

24,3 гектар умумий майдонни эгаллайдиган сотиладиган объектлар (бино ва иншоотлар майдони — 58,3 минг квадрат метр) рўйхати «Тошшаҳартрансхизмат» компанияси сайтида эълон қилинган. Унга 2- ва 3-сонли деполар, Шаҳар электр транспортига хизмат кўрсатиш хизматлари ҳамда 1- ва 2-сонли йўллар хизматлари кирди.

Ҳукумат ҳужжатида қайд этилишича, савдодан тушган маблағ Ўзбекистон Тикланиш ва тараққиёт жамғармасининг аввалги йилларда 400 та Mercedes-Benz Conecto Low Floor автобусини сотиб олиш учун жалб этилган кредитларини тўлаш учун сарфланади.

Тошкент шаҳридаги 9 ва 13-трамвай йўналишларининг иши 22 апрелдан бутунлай тўхтатилди. 17 ва 8-трамвайлар иши тахминан 1 июнга қадар давом этади.