ОАВ: Саудия валиаҳдининг ўринбосари Доҳадаги учрашувнинг муваффақиятсиз якунланиши сабабчиларидан бўлди

Саудия Арабистони валиаҳд шаҳзодасининг ўринбосари, қирол Салмоннинг ўғли Муҳаммад бин Салмон Доҳадаги музокаралар чоғида мамлакат делегациясига босим ўтказгани боис кун тартибидаги масала ижобий ҳал қилинмади. Бу ҳақда, Financial Times нашрига асосланиб, «РБК» хабар бермоқда.

Айтилишича, Муҳаммад бин Салмон 17 апрель куни эрталаб Доҳадаги қироллик делегациясига қўнғироқ қилиб, унинг иштирокчиларидан мамлакатга қайтишни талаб қилган. Саудияликлар Доҳада қолди, лекин, шунга қарамай, музокаралар муваффақиятсиз якунланди.

Financial Times’да ёзилишича, бошқа давлатлар делегатлари ўша пайтда Саудия Арабистони нефть вазири Али ал-Наимий мамлакатнинг нефть қазиб олишни музлатиб қўйиш борасидаги мақсадларини тасдиқлашини кутган. Аммо эртаси куни, 18 апрелда Венесуэла нефть вазири Еулохио дель Пино Саудия делегацияси ҳеч қандай ваколатга эга эмас, деган фикрни айтган.

«Деярли ҳамма келишув бир соат ичида амалга оширилишини ҳис қилиб турганди», — деб тушунтирди вазиятни қатнашчилардан бири. Ҳатто Саудия Арабистонининг иттифоқчиси бўлган Қувайт вакили масала ижобий ҳал этилишига ишонч билдирган эди. Аммо Саудия делегацияси фақатгина Эрон иштирокида қазиб олишни музлатиб қўйишга рози бўлишини даъво қила бошлади, бир муддатдан сўнг эса музокаралар тўхтатилди.

30 ёшли Муҳаммад 2015 йилнинг апрелида, отаси қирол бўлганидан сўнг валиаҳд шаҳзоданинг ўринбосари лавозимини эгаллади. У айни пайтда бош вазирнинг иккинчи ўринбосари, мудофаа вазири, қироллик суди раҳбари ва иқтисодий масалалар кенгаши раисидир. Муҳаммад бин Салмон қўшни Яманда исёнчиларга қарши ҳарбий операцияда иштирок этаётган Саудия армияси қўшилмаларини бошқаради ва мамлакатнинг нефтдан кейинги иқтисодий ривожланиш босқичига ўтиши масаласи билан шуғулланади.

Financial Times саҳифаларида чоп этилган мақолада уқтирилишича, шаҳзода Муҳаммаднинг ҳокимият тепасига келиши билан қиролликнинг энергетика соҳасидаги сиёсати хом ашё нархидан кўра кўпроқ геосиёсат, айниқса Эрон билан минтақавий рақобатга боғлиқ бўлиб қолди. Таъкидланишича, нефть Саудия Арабистони қўлида Эрон билан рақобатлашиш йўлидаги бир қуролга айланиб қолди.