«Даракчи» газетасининг ёзишича, интернетда ўзбекистонлик қўшиқчилар 5 июнни хонандалар куни деб эълон қилгани ҳақида фотохабарлар тарқалган.
Хусусан, «Ниҳол» мукофоти совриндори Машҳурбек Ўзбекистон халқ артистлари Озодбек Назарбеков ва Гулсанам Мамазоитова, шунингдек, хонандалар Умида Мирҳамидова, Дилсўз, Сайёраи Жаҳон, Ширин Маматова кабилар билан бирга қўлда беш рақамини кўрсатиб, селфига тушган.
«Ўзбекнаво» эстрада бирлашмаси матбуот котиби Музаффар Сайфуллаевнинг «Даракчи»га маълум қилишича, бундай байрам ҳақида унинг хабари йўқ. «Шунинг учун бир гап айта олмайман. Балки хонандаларнинг ўзи келишган ҳолда бирор лойиҳа ўйлаётгандир. Аммо бу ҳали расмий эмас», — деди «Ўзбекнаво» вакили.
Мазкур янгилик юзасидан «Даракчи» газетаси шов-шувга сабаб бўлган селфи муаллифи — Машҳурбекка мурожаат қилган.
«Ўйлаб қарасак, хонандаларнинг байрами йўқ экан. Ҳамманинг яхши кун, байрам тадбирларида иштирок этиб, ўзимизга келганда нега байрам қилмаслигимиз керак? Шунинг учун, ҳозирча хонандалар билан келишган ҳолда, 5 июнни ўзимизнинг байрам деб эълон қилмоқчимиз», — деди Машҳурбек.
«Бу сана билан боғлиқ режалаштирган шоу-дастуримиз ҳам бор. Фақат тўлиқ маълумотни байрам куни яқинлашганда эълон қилсак, яхши бўларди. Аслида байрам — бир баҳона, дийдор ғанимат», — дея қўшимча қилди хонанда.
Изоҳ (0)