Португалия терма жамоаси сардори ҳамда Мадриднинг «Реал» клуби ҳужумчиси Криштиану Роналду мамлакат терма жамоаси сафида Рио–2016 Олимпиада ўйинларида иштирок этмайди, деб хабар берди Goal.
31 ёшли форвард Португалия термаси сафида жорий йилнинг ёзида бўлиб ўтадиган турнирлардан фақатгина Евро–2016 да қатнашади. Мазкур турнир 10 июндан 10 июлга қадар Францияда ўтказилади.
Португалиялик машҳур футболчи билан бир қаторда Аргентина терма жамоаси ва «Барселона» клуби етакчиси Лионель Месси ҳам Рио–2016 Олимпиада ўйинларида иштирок этмайди. Аввалроқ Аргентина термаси бош мураббийи Херардо Мартино бу ҳақда маълум қилганди.
Месси мамлакат терма жамоаси сафида ёзда бўлиб ўтадиган турнирлардан Америка Кубоги–2016 да иштирок этади. Ушбу турнир 3—26 июнь кунлари АҚШда ўтказилади.
Эслатиб ўтамиз, 14 апрель, пайшанба куни Рио–2016 Олимпиада ўйинларининг футбол турнирига қуръа ташлаш маросими бўлиб ўтди. Португалия терма жамоаси Аргентина, Жазоир ва Гондурас билан «D» гуруҳидан жой олди.
Маълумот учун, Рио–2016 Олимпиадасининг футбол турнири 3—20 август кунлари бўлиб ўтади. Регламентга мувофиқ, Рио–2016 турнирида 3 нафар 23 ёшдан ошган, қолганлари эса 23 ёшгача бўлган футболчилардан ташкил топган терма жамоалар қатнашади.
Изоҳ (0)