Хитойнинг Сиан Ан шаҳрида бокс бўйича Рио–2016 Олимпиада ўйинлари йўлланмалари учун Осиё ва Океания минтақаларининг қўшма лицензион турнирининг ярим финал беллашувлари ўз ниҳоясига етди ва яна уч нафар ўзбекистонлик спортчи Рио–2016 Олимпиада ўйинларига йўлланмани қўлга киритди.
Ўзбекистон Миллий олимпия қўмитаси матбуот хизматининг маълум қилишича, -81 килограмм вазн тоифасида Элшод Расулов қирғизистонлик Еркин Адилбек улуни иккинчи раундда нокаутга учратиб, муддатдан аввал ғалабани қўлга киритди ва шу орқали у мусобақа финали ҳамда Рио–2016 Олимпиада ўйинларига йўлланма олди.
-91 килограмм вазн тоифасида рингга кўтарилган Рустам Тўлаганов ҳам муддатидан аввал ғалаба қозонди. Австралиялик Жейсон Вателейга қарши жангда ўзбекистонлик боксчи иккинчи раундда рақибини нокаутга учратиб, мусобақа финали ва Рио–2016 Олимпиада ўйинлари йўлланмасини қўлга киритди.
+91 килограмм вазн тоифасида эронлик Абдулмажид Сепахвандига қарши жанг олиб борган Ўзбекистон вакили Баҳодир Жалолов рақибини катта устунлик билан мағлубиятга учратди. У ҳам мусобақа финали ва Рио–2016 Олимпиада ўйинлари йўлланмасига эга бўлди.
Аввалроқ Ҳасанбой Дўсматов (-49 килограмм), Ёдгорой Мирзаева (-51 килограмм), Шаҳобиддин Зоиров (-52 килограмм) ва Шаҳрам Ғиёсов (-69 килограмм) Рио–2016 Олимпиада ўйинларига йўлланма олганлиги ҳақида хабар берилган эди. Шу тариқа, ушбу мусобақада иштирок этаётган етти нафар ўзбекистонлик боксчининг барчаси финал ва Олимпиада йўлланмасига эга чиқди.
Изоҳ (0)