АҚШнинг Федерал савдо комиссияси 29 март, сешанба куни Сан-Франциско округ судига Volkswagen AG’га қарши даъво берди, деб ёзади «РБК». Германия автоконцерни дизель автомобилларини экологик тоза дея реклама қилиб, истеъмолчиларни чалғитгани айтилмоқда.
Регулятор таъкидлашича, Volkswagen’нинг хатти-ҳаракатлари туфайли, америкалик истеъмолчилар «миллиардлаб доллар» миқдорида зарар кўрган.
Volkswagen расмий вакили Жанин Гиниван компания Федерал савдо комиссиясининг шикоятини қабул қилгани ва америкалик регуляторлар билан ҳамкорлик қилишда давом этаётганини маълум қилди.
Эслатиб ўтамиз, 2015 йил сентябрь ойи охирида Volkswagen’нинг дизель двигателлари атрофида катта можаро келиб чиқди. Компания ўзининг 11 миллион автомобилига ноқонуний дастурий таъминот ўрнатганини тан олди.
АҚШ атроф-муҳит муҳофазаси агентлиги ва Калифорния ҳаво ресурслари кенгаши 2014—2016 йиллар моделлар қаторига мансуб Volkswagen, Audi ва Porsche машиналарини тестдан ўтказиш чоғида кўрсатилган зарарли ташланмалар ҳажми мазкур транспорт воситаларидан фойдаланиш пайтида қайд этилганидан кам бўлганини аниқлаган эди.
Кейинроқ АҚШ адлия вазирлиги Volkswagen’ни Тоза ҳаво тўғрисидаги қонун (Clean Air Act)нинг тўртта бандини бузишда айблаб, судга берди.
Изоҳ (0)