«Ўзбеккино» йирик савдо марказларидаги кинотеатрларнинг фильмлар рэпертуарини 1,5 ой ичида тартибга солади

«Ўзбеккино» Миллий агентлиги бош директори Отабек Мусаев йирик савдо марказларининг ичида жойлашган хусусий кинотеатрларнинг рэпертуари оғриқли масалалардан бири эканлигини қайд этиб ўтди. Бу ҳақда агентлик фаолиятига бағишлаб 25 март куни ташкил этилган матбуот анжуманида қатнашган «Дарё» мухбири маълум қилди.

Хабар беришларича, журналистлардан бири: «Йирик савдо марказлари ичида жойлашган кинотеатрларда қўйилаётган фильмларнинг рэпертуарлари назорат қилинадими? Бу кинотеатрлар хусусий бўлгани билан, унда намойиш этилаётган фильмларни фарзандларимиз кўради», — қабилида савол берган.

«Савдо марказлари ичида жойлашган кинотеатрларда намойиш этилаётган фильмлар рэпертуари ва уларнинг назорати ҳам оғриқли масалаларимиздан. Мазкур йўналиш шу вақтгача меъёрий ҳужжатлар билан тартибга солинмаган. Аммо бу кун тартибидаги долзарб масалалардан бири. 1—1,5 ой ичида бу масалани тартибга соламиз», — деди «Ўзбеккино» Миллий агентлиги бош директори Отабек Мусаев.

Аввалроқ «Ўзбеккино» Миллий агентлиги бош директори Ўзбекистонда 2020 йилда тарихий фильм суратга олиниши режалаштирилаётгани, шунингдек, мамлакатдаги коллеж-лицейларнинг мажлис залларидан кинотеатр сифатида фойдаланиш масаласи ўрганиб чиқилаётганини маълум қилгани ҳақида хабар берилган эди.