Миллий матбуот марказида 25 март куни «Ўзбеккино» Миллий агентлиги фаолиятига бағишлаб ташкил этилган матбуот анжуманида таниқли режиссёр, Ўзбекистонда хизмат кўрсатган маданият ходими Ҳилол Насимов агентлик бош директори Отабек Мусаевга кинотеатрлар масаласида мурожаат қилди. Бу ҳақда «Дарё» мухбири хабар берди.
«‘Ўзбек кино кунлари’, ‘Биз буюк юрт фарзандларимиз’ шиори остида ўтказилган тадбирлар билан Ўзбекистоннинг кўплаб вилоятларида бўлдик. Кинотеатрларнинг хусусий тадбиркорларнинг қўлига ўтиб кетгани бизни анча ўйлантириб қўйди. Давлат тасарруфидаги кинотеатрлар қачон қурилади, бу борада режалар борми?», — деб савол берди Ҳилол Насимов.
Отабек Мусаевнинг маълум қилишича, ҳозирги вақтда «Ўзбеккино» тасарруфида олтита кинотеатр мавжуд. Унинг қўшимча қилишича, ҳозирда жойлардаги коллеж-лицейларнинг мажлислар залларидан кинотеатр сифатида фойдаланиш масаласи кўриб чиқилмоқда.
«Ҳозирги вақтда ‘Ўзбеккино’ Миллий агенлиги, Савдо-саноат палатаси, Маданият ва спорт ишлари вазирлиги ҳамда Ички ишлар вазирлиги томонидан, коллеж-лицейларнинг 200, 300, 400 кишилик залларидан, дарсдан бўш вақтда кинотеатр сифатида фойдаланишни назарда тутувчи қўшма қарор тайёрланмоқда», — деди Отабек Мусаев.
«Бу, дарс тугади, эшик очилди, кирларинг, кино кўрларинг, дегани эмас. Йўқ, тўлақонли кинотеатр бўлиши, томошабин ҳақиқий киномуҳитга кириши керак. Мазкур лойиҳа дастлаб синов тартибида Навоий ва Сирдарё вилоятларидаги коллеж-лицейларда амалга оширилиши режалаштирилган», — деди «Ўзбеккино» раҳбари.
«Ҳали жуда кўп ташкилий масалалар бор. Мисол учун, чипта нархлари қандай бўлади, тартиб учун ким масъул бўлади — шу каби масалаларни ишлаб чиқиш жараёнидамиз. Ушбу ишни амалга татбиқ қилсак, анча камчиликлар барҳам топарди», — дея қўшимча қилди «Ўзбеккино» Миллий агентлиги бош директори Отабек Мусаев.
Изоҳ (0)